(विषेश प्रतिनिधी भडगाव )
पाचोरा : जळगाव जिल्हा मध्यवर्ती सहकारी बँकेच्या निवडणुकीच्या पार्श्वभूमीवर पाचोरा-भडगाव तालुक्यातील राजकीय घडामोडींना वेग आला आहे. डॉ. पूनम प्रशांत पाटील यांच्या भाजपकडून उमेदवारीबाबत सध्या राजकीय वर्तुळात मोठी चर्चा सुरू आहे.
पाचोरा आणि भडगाव तालुक्यातील संचालक पदांच्या जागांवरून स्थानिक राजकीय नेत्यांमध्ये मतभेद निर्माण झाल्याची चर्चा होती. नातेसंबंधातून उमेदवारी दिल्याने मराठा समाजातील काही घटकांमध्ये नाराजीचे वातावरण निर्माण झाले होते.
या पार्श्वभूमीवर अमोल शिंदे यांनी डॉ. पूनम पाटील यांच्या उमेदवारीचा प्रस्ताव पुढे केल्याची माहिती समोर आली आहे. दरम्यान, नाराज शिंदे आणि मंत्री गिरीश महाजन यांच्यातील चर्चेचा व्हिडिओ सोशल मीडियावर मोठ्या प्रमाणात व्हायरल झाला होता.
या घडामोडीनंतर मंत्री गिरीश महाजन आणि आमदार मंगेश चव्हाण यांनी परिस्थिती समजून घेत डॉ. पूनम पाटील यांच्या उमेदवारीला हिरवा कंदील दिल्याचा दावा व्हायरल पोस्टमधून करण्यात येत आहे.
त्यामुळे पाचोरा-भडगावच्या राजकीय समीकरणांमध्ये नवे वळण येण्याची शक्यता निर्माण झाली आहे. भाजपकडून डॉ. पूनम प्रशांत पाटील यांच्या उमेदवारीबाबतच्या या चर्चेला आता विशेष महत्त्व प्राप्त झाले आहे.