काळाचा घाला! पिकअपला दुचाकीची धडक; वडिलांसह सहा वर्षांच्या चिमुकलीचा दुर्दैवी अंत आई गंभीर जखमी;

दैनिक आखुर / संतोष एडके तासगाव

तासगाव-मणेराजुरी मार्गावरील भीषण अपघाताने चिंचणी-वासुंबे परिसर हादरला


तासगाव : तासगाव-मणेराजुरी रस्त्यावर ब्रम्हनाथ मंदिर वासुंबे हद्दीत रस्त्याच्या कडेला थांबलेल्या पिकअप वाहनाला दुचाकीने जोरदार धडक दिल्याने भीषण अपघात झाला. या दुर्घटनेत वडील सागर जाधव (वय अंदाजे ४०) आणि त्यांची अवघी सहा वर्षांची मुलगी हर्षिता यांचा दुर्दैवी मृत्यू झाल्याची प्राथमिक माहिती आहे. या अपघातात सागर जाधव यांच्या पत्नी सोनाली जाधव गंभीर जखमी झाल्या असून, त्यांच्यावर उपचार सुरू आहेत.
प्राथमिक माहितीनुसार, चिंचणी येथील रहिवासी आणि सध्या सरस्वती नगर वासुंबे येथे वास्तव्यास असलेले द्राक्ष बागायतदार व अंधश्रद्धा निर्मूलन समितीचे श्री बाबुराव जाधव यांचे पुत्र सागर जाधव हे मुलगी हर्षिता हिला दुचाकीवरून घेऊन तासगाव-मणेराजुरी मार्गावरील एका शाळेत पत्नी सोनाली यांना घेण्यासाठी गेले होते. शाळेतून पत्नीला सोबत घेऊन तिघेही दुचाकीवरून परतत असताना रस्त्याच्या कडेला उभ्या असलेल्या पिकअपला दुचाकीची जोरदार धडक झाली.
धडक एवढी भीषण होती की, दुचाकीवरील तिघेही गंभीर जखमी झाले. नागरिकांनी तातडीने घटनास्थळी धाव घेत जखमींना उपचारासाठी रुग्णालयात दाखल केले. मात्र, उपचारादरम्यान सागर जाधव आणि हर्षिता यांचा मृत्यू झाल्याची प्राथमिक माहिती आहे. सोनाली जाधव यांच्यावर उपचार सुरू आहेत.
चिमुकलीच्या मृत्यूने हळहळ
अवघ्या सहा वर्षांच्या हर्षिताचा अपघाती मृत्यू झाल्याने परिसरातून हळहळ व्यक्त होत आहे. वडील आणि चिमुकल्या मुलीचा एकाच अपघातात मृत्यू झाल्याने जाधव कुटुंबावर दुःखाचा डोंगर कोसळला आहे. या घटनेमुळे चिंचणी, वासुंबे आणि तासगाव परिसरात शोककळा पसरली आहे.
अपघाताबाबतची अधिकृत माहिती, जखमी सोनाली जाधव यांची प्रकृती आणि पुढील कायदेशीर कार्यवाहीची माहिती संबंधित यंत्रणेकडून मिळणे बाकी आहे.