सांगली, दि. 8 : मतदार यादी त्रुटीविरहित व अचूक करण्यासाठी विशेष सखोल पुनरीक्षणाचे काम प्रभावीपणे पूर्ण करावे. एकही पात्र मतदार मतदार यादीतून वगळला जाणार नाही, याची विशेष दक्षता घेत मतदार यादी पुनरीक्षणाची प्रक्रिया निष्पक्ष, पारदर्शक आणि सर्वसमावेशक पद्धतीने राबवावी, अशा सूचना पुणे विभागीय आयुक्त तथा मतदार यादी निरीक्षक शीतल तेली-उगले यांनी दिल्या.
जिल्हाधिकारी कार्यालयात आयोजित मतदार याद्यांच्या विशेष सखोल पुनरीक्षण 2026 कार्यक्रमाच्या आढावा बैठकीत त्या बोलत होत्या. यावेळी जिल्हाधिकारी डॉ. मैनाक घोष यांच्यासह निवडणूक विभागातील अधिकारी उपस्थित होते.
प्रारूप मतदार यादी प्रसिद्ध करण्यात आली असून 30 सप्टेंबरपर्यंत दावे व हरकती नोंदवता येणार आहेत. दावे व हरकतींवरील कार्यवाही पूर्ण करून 4 नोव्हेंबर 2026 रोजी अंतिम मतदार यादी प्रसिद्ध करण्यात येणार आहे.मतदार नोंदणी अधिकारी, सहाय्यक मतदार नोंदणी अधिकारी आणि बीएलओ यांनी प्रभावी समन्वय ठेवून कालबद्ध कार्यक्रमानुसार काम पूर्ण करावे. दावे व हरकतींची सुनावणी मतदारांच्या सोयीच्या ठिकाणी घेऊन त्यांची गैरसोय टाळावी, अशा सूचनाही तेली-उगले यांनी दिल्या.एकगठ्ठा अर्ज स्वीकारले जाणार नाहीत, तसेच कागदपत्र पडताळणीसाठी जिल्हास्तरीय समिती गठित करण्याच्या सूचना देण्यात आल्या. स्वीप उपक्रमांतर्गत मतदारांमध्ये व्यापक जनजागृती करण्यावरही भर देण्यात आला.
बैठकीनंतर राजकीय पक्षांच्या प्रतिनिधींसोबत स्वतंत्र बैठक घेण्यात आली. मतदार यादी अधिक अचूक व पारदर्शक करण्यासाठी राजकीय पक्षांनी सहकार्य करावे, असे आवाहन करण्यात आले. तसेच एकाच कुटुंबातील मतदार शक्यतो एकाच मतदान केंद्रावर राहावेत, यासाठी भारत निवडणूक आयोगाच्या निर्देशानुसार मतदान केंद्रांचे सुसूत्रीकरण करण्याच्या सूचना संबंधित अधिकाऱ्यांना देण्यात आल्या.
⚡ ब्रेकिंग NEWS