गणेशोत्सव शांततेत पार पाडण्यासाठी संजयनगर पोलिसांचे गणेश मंडळांना मार्गदर्शन

गणेशोत्सव शांततेत पार पाडण्यासाठी संजयनगर पोलिसांचे गणेश मंडळांना मार्गदर्शन

गणेशोत्सवाच्या पार्श्वभूमीवर कायदा व सुव्यवस्था अबाधित ठेवण्यासोबतच उत्सव शांततापूर्ण, सुरक्षित व पर्यावरणपूरक वातावरणात साजरा करण्यासाठी संजयनगर पोलिस ठाण्याच्या वतीने गणेश मंडळांच्या पदाधिकाऱ्यांची बैठक घेऊन विविध सूचना व मार्गदर्शक तत्त्वे देण्यात आली.
दि. ३१ ऑगस्ट रोजी सायंकाळी ६ ते ७.३० या वेळेत संजयनगर पोलिस ठाण्याच्या हद्दीतील सार्वजनिक गणेश मंडळांच्या सुमारे १०० ते १२० पदाधिकाऱ्यांची बैठक पार पडली. पोलिस अधीक्षक तुषार दोशी, अपर पोलिस अधीक्षक कल्पना बारवकर, उपविभागीय पोलिस अधिकारी अजय कोकाटे तसेच पोलिस निरीक्षक बजाजीराव कुरळे यांच्या मार्गदर्शनाखाली ही बैठक झाली.
बैठकीमध्ये गणेशोत्सव काळात कायदा व सुव्यवस्था अबाधित राखणे, तसेच नागरिकांच्या सुरक्षिततेच्या दृष्टीने विविध सूचना देण्यात आल्या. गणेश मंडळांनी आवश्यक परवानग्या प्राप्त करूनच उत्सवाचे आयोजन करावे, ध्वनिप्रदूषणाच्या नियमांचे पालन करून निर्धारित वेळेतच ध्वनिक्षेपकांचा वापर करावा, अशा सूचना देण्यात आल्या.
मंडप, विद्युत व्यवस्था व सजावट करताना अग्निसुरक्षेच्या उपाययोजना कराव्यात. सीसीटीव्ही कॅमेरे बसवून स्वयंसेवकांची नियुक्ती करीत सुरक्षा व्यवस्था सक्षम ठेवावी. महिलांच्या सुरक्षेला प्राधान्य देऊन कोणत्याही प्रकारचा छेडछाड अथवा गैरप्रकार होणार नाही, याची दक्षता घ्यावी, असे आवाहन करण्यात आले.
मिरवणुकीदरम्यान वाहतूक नियमांचे पालन करून पोलिस प्रशासनास सहकार्य करावे. सामाजिक सलोखा बिघडेल अथवा धार्मिक भावना दुखावतील, असे कोणतेही कृत्य करू नये. पर्यावरणपूरक गणेशोत्सव साजरा करण्यास प्राधान्य द्यावे, असेही पोलिसांकडून सांगण्यात आले.
संशयित व्यक्ती, वस्तू अथवा कोणतीही अनुचित बाब आढळल्यास तात्काळ पोलिसांशी संपर्क साधावा. तसेच सोशल मीडियावर अफवा, आक्षेपार्ह किंवा दिशाभूल करणारे संदेश प्रसारित करू नयेत, अशा स्पष्ट सूचना देण्यात आल्या.
गणेशोत्सव काळात संजयनगर पोलिसांकडून विशेष बंदोबस्त, गस्त, सीसीटीव्ही निरीक्षण तसेच प्रतिबंधात्मक उपाययोजना राबविण्यात येणार आहेत. सर्व नागरिक, गणेश मंडळांचे पदाधिकारी व स्वयंसेवक यांनी पोलिस प्रशासनास सहकार्य करून उत्सव आनंददायी, सुरक्षित व शांततेत पार पाडावा, असे आवाहन पोलिस निरीक्षक बजाजीराव कुरळे यांनी केले.