सांगली : सांगली शहर पोलीस ठाण्याच्या गुन्हे प्रकटीकरण शाखेने घरफोडी व चोरी करणाऱ्या एका आरोपीला जेरबंद करून त्याच्याकडून २९ ग्रॅम वजनाचे सोन्याचे दागिने व ३३९ ग्रॅम वजनाचे चांदीचे दागिने असा एकूण २ लाख ९५ हजार रुपये किमतीचा मुद्देमाल जप्त केला. या कारवाईमुळे सांगली शहर पोलीस ठाण्यात दाखल असलेले चार घरफोडी व चोरीचे गुन्हे उघडकीस आले आहेत.
पवन प्रकाश पवार (वय ३१, रा. भारत चौक, खणभाग, सांगली) असे अटक करण्यात आलेल्या संशयित आरोपीचे नाव आहे.
सांगली शहरातील घरफोडी व चोरीचे गुन्हे उघडकीस आणण्याचे आदेश पोलीस अधीक्षक तुषार दोषी व अपर पोलीस अधीक्षक कल्पना बारवकर यांनी दिले होते. उपविभागीय पोलीस अधिकारी अजय कोकाटे यांच्या मार्गदर्शनाखाली सांगली शहर पोलीस ठाण्याचे पोलीस निरीक्षक अरुण सुगांवकर यांनी गुन्हे प्रकटीकरण शाखेचे पथक तयार करून कारवाईचे आदेश दिले.
दरम्यान, २९ ऑगस्ट रोजी पोलीस हवालदार संदीप पाटील व सचिन तिवडे यांना त्यांच्या बातमीदारामार्फत पवन पवार हा चोरीचे दागिने विक्री करण्यासाठी सांगली शहरातील स्टेशन चौक येथे येणार असल्याची माहिती मिळाली. या माहितीच्या आधारे पोलिसांनी स्टेशन चौक येथे सापळा रचून पवन पवार याला ताब्यात घेतले. त्याची अंगझडती घेतली असता त्याच्याकडे सोने-चांदीचे दागिने आढळून आले.
पोलिसांनी त्याच्याकडे अधिक चौकशी केली असता, आकाशवाणी केंद्राच्या पाठीमागील बंद घराचे कुलूप तोडून तसेच हरिपूर रोड परिसरातील काळीवाट साई मंदिराजवळील घरातून दागिने चोरल्याची माहिती त्याने दिली. त्यानंतर सांगली शहर पोलीस ठाण्यातील गुन्हे अभिलेखाची पडताळणी केली असता आरोपीचा चार घरफोडी व चोरीच्या गुन्ह्यांशी संबंध असल्याचे निष्पन्न झाले.
या कारवाईत गुन्हा क्रमांक ३५/२०२६, ८०/२०२६, १९९/२०२६ आणि २३६/२०२६ अशा चार गुन्ह्यांचा तपास लागला आहे. आरोपीकडून २९ ग्रॅम सोन्याचे व ३३९ ग्रॅम चांदीचे दागिने असा एकूण २ लाख ९५ हजार रुपयांचा मुद्देमाल जप्त करण्यात आला आहे.
ही कारवाई पोलीस निरीक्षक अरुण सुगांवकर यांच्या आदेशानुसार पोउनि संतोष यादव, पोहेकॉ संदीप पाटील, सचिन तिवडे, विनायक शिंदे, सतीश लिंबळे, गौतम कांबळे, संतोष गळवे, शंकर रणधीर, डिसले, गणेश कांबळे, गणेश कोळेकर, अभिषेक वाडकर व दिग्विजय साळुंखे यांच्या पथकाने केली. आरोपीविरुद्ध पुढील तपास सुरू आहे.
⚡ ब्रेकिंग NEWS