तासगाव अंनिस शाखेतर्फे वैज्ञानिक दृष्टिकोन दिन साजरा; दाभोलकर हत्येतील सूत्रधारांना शिक्षा करण्याची मागणी

तासगाव : महाराष्ट्र अंधश्रद्धा निर्मूलन समितीच्या (अंनिस) तासगाव शाखेतर्फे डॉ. नरेंद्र दाभोलकर यांचा तेरावा स्मृतिदिन ‘वैज्ञानिक दृष्टिकोन दिन’ दिनांक २०ऑगस्ट रोजी विविध उपक्रमांनी साजरा करण्यात आला.
खंडोबाची वाडी, चिंचणी, आरवडे, मणेराजुरी आणि कवठेएकंद येथील माध्यमिक शाळांमध्ये ‘वैज्ञानिक दृष्टिकोन म्हणजे काय?’ या विषयावर व्याख्याने घेण्यात आली. तसेच विद्यार्थ्यांसमोर विविध चमत्कारांचे वैज्ञानिक स्पष्टीकरण देणारे प्रात्यक्षिक सादर करण्यात आले.
या उपक्रमात माजी प्राचार्य मस्के, एच. बी. पाटील, प्रा. वासुदेव गुरव, राज्य कार्यकारिणी सदस्या सुजाता म्हेत्रे, नूतन परिट, जिल्हा कार्याध्यक्ष अमर खोत आणि तालुका सचिव प्रा. संजय वावरे सहभागी झाले. संस्थामाता सुशिलादेवी साळुंखे महिला शिक्षणशास्त्र महाविद्यालयाचे प्राचार्य, शिक्षक व विद्यार्थिनींचे विशेष सहकार्य लाभले.
दरम्यान, डॉ. नरेंद्र दाभोलकर यांच्या हत्येच्या मागील मुख्य सूत्रधारांना शोधून त्यांना शिक्षा करण्यात यावी, या मागणीचे निवेदन तासगाव अंनिसच्या वतीने तहसीलदार, तासगाव यांना देण्यात आले. यावेळी जिल्हा कार्याध्यक्ष अमर खोत, भरत थोरात, रवी जाधव, प्रा. वासुदेव गुरव यांच्यासह अंनिसचे कार्यकर्ते उपस्थित होते.