कै. श्रीकांत सांबारी अष्टपैलू समाजसेवक पुरस्कार’ २०२६ श्रीमती वंदना करंबेळकर यांना जाहीर

आचरा येथील वैभवशाली श्री देव रामेश्वर ग्रामबि. सह. पतसंस्था मर्या., आचरा या संस्थेच्या वतीने देण्यात येणारा ‘कै. श्रीकांत सांबारी अष्टपैलू समाजसेवक पुरस्कार’ २०२६ यावर्षी सावंतवाडी येथील सामाजिक कार्यकर्त्या श्रीमती वंदना श्रीकृष्ण करंबेळकर यांना जाहीर करण्यात आला आहे. याबाबतची माहिती संस्थेचे चेअरमन मंदार सांबारी यांनी दिली.

कै. श्रीकांत सांबारी यांच्या स्मृतीप्रित्यर्थ गेल्या तीन वर्षांपासून या पुरस्काराचे वितरण करण्यात येत आहे. यावर्षीचा हा चौथा पुरस्कार असून, शिक्षण, आरोग्य आणि महिला सक्षमीकरणाच्या क्षेत्रात श्रीमती वंदना करंबेळकर यांनी केलेल्या उल्लेखनीय कार्याची दखल घेत त्यांची या पुरस्कारासाठी निवड करण्यात आली आहे.

शिक्षण, आरोग्य तसेच महिला सक्षमीकरणाच्या माध्यमातून समाजासाठी त्यांनी दिलेले योगदान अमूल्य असून, त्यांच्या सामाजिक कार्याचा गौरव म्हणून हा पुरस्कार जाहीर करण्यात आल्याचे चेअरमन मंदार सांबारी यांनी सांगितले.

दरम्यान, दि. २५ ऑगस्ट रोजी संस्थेच्या वार्षिक सर्वसाधारण सभेत श्रीमती वंदना करंबेळकर यांना या पुरस्काराने सन्मानित करण्यात येणार आहे. संस्थेच्या वतीने दरवर्षी देण्यात येणाऱ्या या पुरस्कारामुळे सामाजिक क्षेत्रात उल्लेखनीय कार्य करणाऱ्या व्यक्तींच्या कार्याचा गौरव होत आहे.