शेटफळे गावच्या शिरपेचात मानाचा तुरा; कु. सृष्टी भोरे महाराष्ट्र राष्ट्रभाषा परीक्षेत पुणे केंद्रात प्रथम

आटपाडी तालुक्यातील शेटफळे गावची सुकन्या कु. सृष्टी गणपत भोरे हिने महाराष्ट्र राष्ट्रभाषा परीक्षेत उल्लेखनीय यश संपादन करत पुणे केंद्रात प्रथम क्रमांक पटकावला आहे. या दैदिप्यमान यशामुळे शेटफळे गावाच्या शिरपेचात आणखी एक मानाचा तुरा रोवला गेला असून, परिसरातून तिच्यावर अभिनंदनाचा वर्षाव होत आहे.

कु. सृष्टी भोरे ही एस. एस. पी. एम. एस. डे स्कूल अँड ज्युनिअर कॉलेज, पुणे येथे इयत्ता दहावीमध्ये शिक्षण घेत आहे. शालेय शिक्षणासोबतच महाराष्ट्र राष्ट्रभाषा परीक्षेची मेहनतीने तयारी करून तिने हे उल्लेखनीय यश संपादन केले आहे.

या यशामागे शाळेच्या प्राचार्या शिवाली जगताप, वर्गशिक्षिका दिपाली मुळीक, तसेच शाळेतील सर्व शिक्षकवृंद यांचे मोलाचे मार्गदर्शन लाभल्याचे सृष्टीने आपल्या मनोगतात सांगितले. याशिवाय आई-वडील, कुटुंबीय आणि सहकाऱ्यांचेही तिला सातत्याने प्रोत्साहन मिळाले.

विशेष म्हणजे, कु. सृष्टी गणपत भोरे ही दैनिक तुफान क्रांतीचे सोलापूर जिल्हा प्रतिनिधी गुलचंद भोरे यांच्या भावाची कन्या असून, कुटुंबीयांच्या पाठिंब्यामुळेच हे यश मिळाल्याची भावना तिने व्यक्त केली.

कु. सृष्टीच्या या उल्लेखनीय यशाबद्दल शाळा, शिक्षक, नातेवाईक, मित्रपरिवार तसेच शेटफळे गावातील नागरिकांकडून तिचे मनःपूर्वक अभिनंदन करण्यात येत असून, भविष्यातील शैक्षणिक वाटचालीसाठी तिला हार्दिक शुभेच्छांचा वर्षाव होत आहे.