माजी नगरसेवक गौतम खुडकर यांचा इशारा
कणकवली : शहरातील वॉर्ड क्रमांक ८ मधील सिद्धार्थनगर स्मशानभूमीतील अपुऱ्या मूलभूत सुविधांबाबत माजी नगरसेवक गौतम खुडकर यांनी तीव्र नाराजी व्यक्त करत नगरपंचायत प्रशासनाला इशारा दिला आहे. स्मशानभूमीतील लाकडाची व्यवस्था, वीजपुरवठा आणि संरक्षण भिंतीचे काम तातडीने पूर्ण करावे, अन्यथा येत्या १५ ऑगस्ट रोजी कणकवली नगरपंचायत कार्यालयासमोर एकदिवसीय लक्षवेध आंदोलन करण्यात येईल, असा इशारा त्यांनी दिला आहे.सिद्धार्थनगर स्मशानभूमी अद्ययावत व्हावी यासाठी अनेक वर्षे पाठपुरावा करण्यात आला होता. त्यानंतर या ठिकाणी बौद्ध समाजातील बांधवांच्या अंत्यसंस्कारासाठी आवश्यक सुविधा उभारण्यात आल्या. अंत्यसंस्कारासाठी लागणाऱ्या लाकडाच्या साठवणुकीसाठी गोडाऊन शेडही मंजूर होऊन त्याचे बांधकाम पूर्ण होऊन सुमारे चार महिने उलटले आहेत. मात्र, अद्याप त्या ठिकाणी लाकडाची व्यवस्था करण्यात आलेली नसल्याने नागरिकांना मोठ्या अडचणींचा सामना करावा लागत असल्याचे खुडकर यांनी म्हटले आहे.
गेल्या तीन ते चार महिन्यांत पाच ते सहा अंत्यसंस्कार या स्मशानभूमीत झाले असून प्रत्येक वेळी सार्वजनिक स्मशानभूमीतून लाकूड आणावे लागत आहे. त्यामुळे वाहतूक खर्चाचा अतिरिक्त आर्थिक भार गोरगरीब कुटुंबांवर पडत असल्याचा मुद्दाही त्यांनी उपस्थित केला आहे.
याशिवाय, स्मशानभूमीत अनेक महिन्यांपासून वीजपुरवठा नसल्याने रात्रीच्या वेळी अंत्यसंस्कार करणे कठीण होत आहे. तसेच स्मशानभूमीच्या बाजूने नदी वाहत असल्याने शेडला भविष्यात धोका निर्माण होण्याची शक्यता असून त्या ठिकाणी संरक्षण भिंत उभारणेही आवश्यक असल्याचे त्यांनी नमूद केले आहे.
स्मशानभूमीतील या सर्व समस्या तातडीने सोडवून आवश्यक सुविधा उपलब्ध करून द्याव्यात, अशी मागणी करत १५ ऑगस्टपूर्वी प्रशासनाने कार्यवाही न केल्यास नगरपंचायत कार्यालयासमोर एकदिवसीय लक्षवेध आंदोलन करण्यात येईल, असा इशारा माजी नगरसेवक गौतम खुडकर यांनी दिला आहे.