आटपाडीत वाळू माफियांना अभय? मनसेचा प्रशासनावर थेट हल्लाबोल; चौकशी व निलंबनाची मागणी!

आटपाडी तालुक्यात सुरू असलेल्या कथित अवैध वाळू तस्करीच्या प्रकरणाने आता राजकीय आणि प्रशासकीय वर्तुळात मोठी खळबळ उडवली आहे. महाराष्ट्र नवनिर्माण सेना शेतकरी सेनेचे सांगली जिल्हा उपाध्यक्ष प्रकाश आबासो गायकवाड यांनी व्हायरल झालेल्या कथित व्हिडिओची उच्चस्तरीय चौकशी करून संबंधित ग्राममहसूल अधिकारी, कोतवाल व इतर कर्मचाऱ्यांना तात्काळ निलंबित करण्याची मागणी केली आहे. यासंदर्भात जिल्हाधिकारी, प्रांताधिकारी आणि तहसीलदार यांना सविस्तर निवेदन देण्यात आले आहे.
निवेदनानुसार, आटपाडी तालुक्यातील विविध नदीपात्रांमध्ये गेल्या अनेक महिन्यांपासून जेसीबी, ट्रॅक्टर आणि डंपरच्या सहाय्याने मोठ्या प्रमाणात कथित अवैध वाळू उपसा सुरू असून त्यामुळे शासनाचा लाखो रुपयांचा महसूल बुडत आहे. रात्रीच्या अंधारात सुरू असलेल्या या प्रकाराकडे संबंधित यंत्रणा दुर्लक्ष करत असल्याचा आरोप करण्यात आला आहे.
व्हायरल व्हिडिओने संशय अधिक गडद
काही दिवसांपूर्वी सोशल मीडियावर व्हायरल झालेल्या एका कथित व्हिडिओमध्ये नदीपात्रात जेसीबीद्वारे वाळू भरली जात असल्याचे दिसत असल्याचा दावा करण्यात आला आहे. त्याचवेळी महसूल विभागाचे वाहन घटनास्थळी पोहोचल्याचेही दिसत असल्याचे सांगण्यात आले आहे. मात्र, कारवाई करण्याऐवजी वाळू तस्करांना अभय दिले जात असल्याचा संशय या दृश्यांमुळे निर्माण झाल्याचे निवेदनात नमूद करण्यात आले आहे.
कोतवालाच्या भूमिकेवरही प्रश्नचिन्ह
मनसेने व्हिडिओमध्ये कोतवाल गोरख जावीर दिसत असल्याचा दावा करत त्यांच्या भूमिकेची निष्पक्ष चौकशी करण्याची मागणी केली आहे. तसेच वाहनात ग्राममहसूल अधिकारी व इतर कर्मचारी उपस्थित असल्याची शक्यता व्यक्त करत सर्व संबंधितांची जबाबदारी निश्चित करण्याची मागणी करण्यात आली आहे.
महसूल बुडतोय, पर्यावरण धोक्यात
अवैध वाळू उपशामुळे शासनाचा महसूल बुडत असून नदीपात्रांचे नैसर्गिक स्वरूप बदलत आहे. भूजल पातळीवरही परिणाम होत असल्याने पर्यावरणीय संतुलन धोक्यात येत असल्याचा आरोप मनसेने केला आहे.
तात्काळ कारवाईची मागणी
प्रकाश गायकवाड यांनी व्हायरल व्हिडिओची स्वतंत्र आणि निष्पक्ष चौकशी करून चौकशी पूर्ण होईपर्यंत संबंधित अधिकारी व कर्मचाऱ्यांना निलंबित करावे, तसेच अवैध उत्खननासाठी वापरण्यात आलेले जेसीबी, ट्रॅक्टर व डंपर जप्त करून संबंधितांवर फौजदारी गुन्हे दाखल करावेत, अशी मागणी केली आहे.
"कारवाई नाही तर तीव्र आंदोलन"
"आटपाडीत सुरू असलेल्या कथित अवैध वाळू तस्करीमुळे शासनाचा महसूल बुडत आहे. व्हायरल व्हिडिओतील बाबींची उच्चस्तरीय चौकशी करून दोषींवर कठोर कारवाई झाली नाही, तर महाराष्ट्र नवनिर्माण सेना शेतकरी सेना रस्त्यावर उतरून तीव्र आंदोलन छेडेल," असा इशारा जिल्हा उपाध्यक्ष प्रकाश आबासो गायकवाड यांनी दिला आहे.
आता या निवेदनानंतर प्रशासन काय भूमिका घेते, व्हायरल व्हिडिओची चौकशी होते का आणि संशयाच्या भोवऱ्यात सापडलेल्या संबंधितांवर कारवाई होते का, याकडे संपूर्ण आटपाडी तालुक्याचे लक्ष लागले आहे.