मणेराजुरी येथे तलावात बुडून माय-लेकीचा दुर्दैवी मृत्यू; चिमुरडीला वाचवताना आईनेही गमावला जीव

मणेराजुरी (ता. तासगाव):
येथील चिमणखोरा पाझर तलावात बुडणाऱ्या आपल्या ७ वर्षांच्या मुलीला वाचवण्याच्या प्रयत्नात आईचाही बुडून मृत्यू झाल्याची हृदयद्रावक घटना घडली आहे. या अपघातात मंजू संतोष जाधव (वय ७) आणि तिची आई सत्यवाला संतोष जाधव (वय २८) या माय-लेकींचा दुर्दैवी अंत झाला. या घटनेमुळे मणेराजुरी आणि परिसरात सर्वत्र हळहळ व्यक्त होत आहे.
​खेळताना पाय घसरून चिमुरडी पडली पाण्यात
​मिळालेल्या माहितीनुसार, बुधवारी दुपारच्या सुमारास सत्यवाला जाधव या आपल्या दोन मुलींसह मणेराजुरी-वज्रचौंडे मार्गावरील भोसलेनगर जवळील 'चिमणखोरा पाझर तलावावर' कपडे धुण्यासाठी गेल्या होत्या. सत्यवाला या मोठ्या मुलीसोबत कपडे धुण्यात व्यस्त असताना, लहान मुलगी मंजू तलावाच्या काठावर खेळत होती. खेळत असताना अचानक तिचा पाय घसरला आणि ती तलावाच्या खोल पाण्यात पडली.
​लेकीला वाचवण्यासाठी आईची पाण्यात उडी
​मंजू पाण्यात बुडत असल्याचे पाहताच, आई सत्यवाला यांनी कोणताही विचार न करता तिला वाचवण्यासाठी थेट तलावात उडी घेतली. परंतु, पाण्याचा अंदाज न आल्याने आणि तलावाची खोली जास्त असल्याने त्या दोन्ही माय-लेकी पाण्यात बुडू लागल्या.
​मोठ्या मुलीने दिली माहिती; गावकऱ्यांची धाव
​हा प्रकार पाहून सोबत असलेल्या मोठ्या मुलीने तात्काळ घरी जाऊन आजी-आजोबा आणि गावकऱ्यांना घटनेची माहिती दिली. माहिती मिळताच गावातील तरुणांनी आणि नागरिकांनी तलावाकडे धाव घेतली. गावकऱ्यांनी अथक प्रयत्न करून माय-लेकींचे मृतदेह पाण्यातून बाहेर काढले.
​घटनेची माहिती मिळताच तासगाव पोलीस ठाण्याचे पोलीस अधिकारी कर्मचाऱ्यांसह घटनास्थळी दाखल झाले. पोलिसांनी घटनेचा पंचनामा करून मृतदेह ताब्यात घेतले असून पुढील कायदेशीर प्रक्रिया सुरू केली आहे. या दुर्दैवी घटनेमुळे जाधव कुटुंबावर दुःखाचा डोंगर कोसळला आहे.