एकजुटीतूनच समाजाची प्रगती; तासगाव तालुका कुंभार समाज मेळाव्यात गुणवंतांचा गौरव!

"जोपर्यंत समाज एकत्र येत नाही, तोपर्यंत समाजाची सर्वांगीण उन्नती शक्य नाही. आजच्या तीव्र स्पर्धात्मक युगात विद्यार्थ्यांनी आत्मविश्वास आणि जिद्दीच्या जोरावर प्रत्येक क्षेत्रात पुढे जावे," असे प्रतिपादन सांगली जिल्हा कृषी अधिकारी विवेक कुंभार यांनी केले.
तासगाव तालुका कुंभार समाज संघटनेच्या वतीने आयोजित गुणवंत विद्यार्थी, विशेष प्राविण्य प्राप्त युवक-युवती आणि त्यांच्या पालकांच्या सत्कार समारंभात ते मुख्य पाहुणे म्हणून बोलत होते.
यावेळी व्यासपीठावर सातारा येथील कार्यकारी अभियंता संतोष कुंभार, स्वीकृत नगरसेवक तुकाराम कुंभार, 'साप्ताहिक कुंभशिल्प'चे संपादक नितीन कुंभार आदी मान्यवर उपस्थित होते. सुरुवातीला सौ. सोनाली किरण कुंभार यांनी स्वागत व प्रास्ताविक केले.
मार्गदर्शन करताना कार्यकारी अभियंता संतोष कुंभार म्हणाले की, भविष्यातील आव्हाने पेलण्यासाठी विद्यार्थ्यांनी सातत्याने प्रयत्न करावेत, अशा सत्कारातून विद्यार्थ्यांना पुढे जाण्याची प्रेरणा मिळते. तर तुकाराम कुंभार यांनी गुणवंतांचा गौरव करणे ही काळाची गरज असल्याचे सांगितले यावेळी कुंभार समाजाचे नेते सोमनाथकुंभार यांनीही चांगला समाज घडविण्याचे महत्त्व अधोरेखित केले.
सार्थक गायकवाडचा विशेष गौरव:
या सोहळ्यात तालुक्यातील सार्थक सुनील गायकवाड याची 'इंडियन एअर फोर्स'मध्ये 'एअरमन' पदावर निवड झाल्याबद्दल समाजाच्या वतीने विशेष सन्मान करण्यात आला. त्याच्या या यशामुळे उपस्थितांमध्ये अभिमानाचे वातावरण होते.
कार्यक्रमात सर्व गुणवंत विद्यार्थ्यांना शैक्षणिक साहित्य व प्रमाणपत्र, तसेच पालकांना शाल-श्रीफळ देऊन गौरविण्यात आले. कार्यक्रमासाठी साप्ताहिक कुंभशिल्पचे संपादक श्री नितीन कुंभार यांचे विशेष सहकार्य लाभले. सचिन कुंभार यांनी उपस्थितांचे आभार मानले. या प्रसंगी तालुक्यातील कुंभार समाजाचे पदाधिकारी, महिला व समाजबांधव मोठ्या संख्येने उपस्थित होते.