उदनवाडीत पुण्यश्लोक राजमाता अहिल्यादेवी होळकर यांची ३०१ वी जयंती उत्साहात साजरी

उदनवाडी, ता. सांगोला : पुण्यश्लोक राजमाता अहिल्यादेवी कला, क्रीडा व सांस्कृतिक मंडळ, उदनवाडी यांच्या वतीने पुण्यश्लोक राजमाता अहिल्यादेवी होळकर यांची ३०१ वी जयंती विविध सामाजिक, सांस्कृतिक व लोकोपयोगी उपक्रमांनी मोठ्या उत्साहात साजरी करण्यात आली.
जयंती उत्सवाची सुरुवात रविवार, दि. ३१ मे रोजी सकाळी पुण्यश्लोक राजमाता अहिल्यादेवी होळकर यांच्या प्रतिमेच्या पूजनाने झाली. सायंकाळी मायाक्कादेवी ओविकार मंडळ, उदनवाडी यांच्या वतीने "पुण्यश्लोक राजमाता अहिल्यादेवी होळकर आख्यान" या विषयावरील ओवी कार्यक्रम संपन्न झाला.
सोमवार, दि. १ जून रोजी मंडळ व रेवनील रक्तपेढी, सांगोला यांच्या संयुक्त विद्यमाने रक्तदान शिबिराचे आयोजन करण्यात आले. या शिबिरात मोठ्या संख्येने रक्तदात्यांनी सहभाग घेत रक्तदान केले. त्यानंतर गुणवंत विद्यार्थ्यांचा सत्कार करण्यात आला. सायंकाळी आयोजित करण्यात आलेल्या भव्य सांस्कृतिक कार्यक्रमात महाराष्ट्राच्या विविध भागांतून आलेल्या स्पर्धकांनी आकर्षक नृत्याविष्कार सादर करून उपस्थितांची मने जिंकली. हा कार्यक्रम पाहण्यासाठी परिसरातील नागरिकांनी मोठी गर्दी केली होती.
तसेच मंगळवार, दि. ३ जून रोजी युवक नेते मा. अक्षयभाऊ वलेकर यांच्या पुढाकारातून भव्य घोडागाडी शर्यतीचे आयोजन करण्यात आले. या शर्यतीत धनाजी सरगर यांनी प्रथम, भारत आलदर यांनी द्वितीय तर परमेश्वर रुपनर यांनी तृतीय क्रमांक पटकावला. या स्पर्धेला स्पर्धक व प्रेक्षकांचा उत्स्फूर्त प्रतिसाद लाभला.
यंदाची ३०१ वी जयंती सामाजिक बांधिलकी जपत रक्तदान, गुणवंतांचा गौरव, सांस्कृतिक कार्यक्रम आणि पारंपरिक क्रीडा स्पर्धांच्या माध्यमातून उत्साहपूर्ण वातावरणात साजरी करण्यात आली. कार्यक्रमाच्या यशस्वितेसाठी मंडळाचे सर्व सदस्य, उदनवाडी व परिसरातील ग्रामस्थ तसेच युवकांचे मोलाचे सहकार्य लाभले. शेवटी मंडळाच्या वतीने सर्व सहकाऱ्यांचे आभार मानण्यात आले.