भाटकी गावचे सुपुत्र प्रा. शिवाजी कोळेकर यांना ‘वाणिज्य’ विषयात डॉक्टरेट (पीएच.डी.) पदवी प्रदान

माण तालुक्यातील भाटकी गावचे सुपुत्र प्राध्यापक शिवाजी कोळेकर यांना सावित्रीबाई फुले पुणे विद्यापीठाच्या वाणिज्य विद्याशाखेतून पीएच.डी. (डॉक्टरेट) पदवी जाहीर झाली आहे. ग्रामीण भागातील एका सामान्य कुटुंबातील तरुणाने शिक्षण क्षेत्रात मिळवलेल्या या उत्तुंग यशामुळे भाटकी गावासह संपूर्ण माण तालुक्यात आनंदाचे वातावरण असून, त्यांच्यावर कौतुकाचा वर्षाव होत आहे.


प्रा. शिवाजी कोळेकर यांनी "पश्चिम महाराष्ट्रातील स्थानिक स्वराज्य संस्थांमार्फत राबविण्यात येणाऱ्या ग्रामीण विकास योजनांच्या कामगिरीचा चिकित्सक अभ्यास" या विषयावर आपला महत्त्वपूर्ण शोधप्रबंध सादर केला होता. त्यांनी आपल्या संशोधनात महात्मा गांधी राष्ट्रीय ग्रामीण रोजगार हमी योजना (मनरेगा), प्रधानमंत्री आवास योजना (ग्रामीण) आणि प्रधानमंत्री ग्राम सडक योजना यांसारख्या प्रमुख ग्रामीण विकास योजनांच्या प्रत्यक्ष कामगिरीचे सखोल मूल्यमापन केले आहे.

त्यांनी आपले हे संशोधन ग्रामोन्नती मंडळाचे कला, वाणिज्य आणि विज्ञान महाविद्यालय, नारायणगाव येथील संशोधन केंद्रात पूर्ण केले. त्यांच्या या संशोधन कार्यासाठी श्री ज्ञानेश्वर महाविद्यालय, नेवासा (जि. अहिल्यानगर) येथील डॉ. संजय बाळू शिंदे यांचे मोलाचे मार्गदर्शन लाभले.
प्रा. कोळेकर यांच्या या उल्लेखनीय शैक्षणिक यशामुळे शिक्षण क्षेत्रासह राजकीय, सामाजिक आणि विविध स्तरांतून त्यांचे मोठे कौतुक व अभिनंदन केले जात आहे. ग्रामीण भागातील विद्यार्थ्यांसाठी त्यांचा हा प्रवास अत्यंत प्रेरणादायी ठरणारा आहे.प्रा शिवाजी कोळेकर यांचे राष्ट्रवादीचे नेते प्रभाकर देशमुख व भाटकी गावातील ग्रामस्थांनी अभिनंदन केले.