उदनवाडी येथे मायाक्का देवीची यात्रा भक्तिमय वातावरणात उत्साहात संपन्न

उदनवाडी (ता. सांगोला) : ग्रामदैवत मायाक्का देवीची वार्षिक यात्रा यंदाही मोठ्या उत्साहात आणि भक्तिमय वातावरणात संपन्न झाली. शनिवार, दि. २५ एप्रिल २०२६ रोजी देवीला तेल लावण्याच्या विधीने यात्रेची सुरुवात झाली.
मंगळवार, दि. २८ एप्रिल रोजी यात्रेनिमित्त युवक नेते प्रशांत भाऊ वलेकर व अक्षयभाऊ वलेकर यांच्या पुढाकारातून बैलगाडी व घोडा शर्यतींचे आयोजन करण्यात आले. या स्पर्धांमध्ये मोठ्या संख्येने स्पर्धक सहभागी झाले होते. रंगतदार शर्यतींनी उपस्थित प्रेक्षकांचे मन जिंकले. संध्याकाळी पांडुरंग एकतारी भजनी मंडळ, उदनवाडी यांचा एकतारी भजनाचा कार्यक्रम पार पडला.
बुधवार, दि. २९ एप्रिल हा यात्रेचा मुख्य दिवस असून नैवेद्याचा कार्यक्रम पार पडला. या दिवशी मायाक्का देवी ओविकार मंडळ (उदनवाडी) व बिरुदेव ओविकार मंडळ (गौडवाडी) यांच्या ओवी गायनाचा कार्यक्रम झाला. सायंकाळी ७ वाजता मायाक्का देवीची पालखी गावातून भव्य मिरवणुकीने काढण्यात आली. फटाक्यांची आतषबाजी, हलगी-ढोल वादन आणि जयघोषामुळे संपूर्ण गाव दुमदुमून गेले होते. या सोहळ्यात मोठ्या संख्येने भाविक, महिला व लहानथोर नागरिक सहभागी झाले.
रात्री ९ वाजता कोल्हापूर येथील ‘किशोर कुमार म्युझिकल नाईट’ या आर्केस्ट्राचा कार्यक्रमही रंगला. गुरुवार, दि. ३० एप्रिल रोजी खिरीच्या महाप्रसादाने यात्रेची सांगता करण्यात आली.
ही यात्रा यशस्वी करण्यासाठी मायाक्का देवी यात्रा कमिटी, उदनवाडी तसेच गावातील व परिसरातील सर्व नागरिकांचे मोलाचे सहकार्य लाभले. सर्वांचे आभार मानत पुढील वर्षीही अशीच भव्य यात्रा आयोजित करण्याचा संकल्प समितीने व्यक्त केला.