आषाढी एकादशीच्या पावन पर्वानिमित्त माण तालुक्यातील टाकेवाडी येथे पारंपरिक दिंडी सोहळा अत्यंत भक्तिमय आणि उत्साहपूर्ण वातावरणात पार पडला. श्री विठ्ठल-रुक्मिणीच्या दर्शनासाठी निघालेल्या श्री संत बाळूमामा दिंडीचे गावात आगमन होताच संपूर्ण गाव भक्तिरसात न्हाऊन निघाले. विठ्ठल मंदिर परिसरात "पुंडलिक वरदा हरी विठ्ठल", "ज्ञानोबा-तुकाराम" अशा जयघोषांनी वातावरण भारावून गेले.
दिंडीच्या स्वागतासाठी गावातील महिला, पुरुष, ज्येष्ठ नागरिक, युवक तसेच विद्यार्थ्यांनी मोठ्या संख्येने सहभाग घेतला. भगव्या पताका, टाळ-मृदंगाचा निनाद आणि विठ्ठल नामाच्या अखंड गजराने संपूर्ण टाकेवाडी भक्तिमय झाली. यावेळी माध्यमिक विद्यालयातील विद्यार्थ्यांनी विठ्ठल भक्तीपर गीतांवर आकर्षक नृत्य सादर करून उपस्थितांची मने जिंकली.विद्यार्थ्यांच्या सादरीकरणाला ग्रामस्थांनी उत्स्फूर्त दाद दिली.कार्यक्रमानंतर गावातील सर्व ग्रामस्थ, वारकरी आणि विद्यार्थ्यांसाठी महाप्रसादाचे आयोजन करण्यात आले होते. या महाप्रसादाचा शेकडो भाविकांनी लाभ घेतला.
संपूर्ण सोहळ्याचे नियोजन व आयोजन ग्रामपंचायत टाकेवाडी यांच्या वतीने करण्यात आले. गावातील सर्व नागरिकांनी एकत्र येत कार्यक्रम यशस्वी करण्यासाठी मोलाचे सहकार्य केले. धार्मिक परंपरा, सामाजिक ऐक्य आणि वारकरी संस्कृतीचे दर्शन घडवणारा हा दिंडी सोहळा टाकेवाडीकरांसाठी अविस्मरणीय ठरला.
⚡ ब्रेकिंग NEWS