गाबीत समाजाच्या जात प्रमाणपत्र व जात पडताळणीच्या प्रश्नांवर जिल्हाधिकाऱ्यांना निवेदन

गाबीत समाजातील नागरिकांना जात प्रमाणपत्र व जात पडताळणी प्रक्रियेत येणाऱ्या अडचणींबाबत गाबीत समाजाच्या शिष्टमंडळाने सिंधुदुर्गच्या जिल्हाधिकारी मा. तृप्ती धोंडमिसे यांची भेट घेऊन सविस्तर चर्चा केली तसेच निवेदन सादर केले.

यावेळी गाबीत समाज महासंघाचे अध्यक्ष तथा माजी आमदार परशुराम उपरकर, गाबीत समाज सिंधुदुर्गचे जिल्हाध्यक्ष चंद्रशेखर उपरकर, कार्याध्यक्ष हरिश्चंद्र खोबरेकर, मालवण तालुका पदाधिकारी अन्वय प्रभू, सावंतवाडी-दोडामार्ग गाबीत समाजाचे सचिव दीपक तारी आणि उपाध्यक्ष बाबाजी तारी उपस्थित होते.

नवीन शैक्षणिक वर्ष सुरू झाल्याने विद्यार्थ्यांच्या प्रवेश प्रक्रियेसाठी, विविध शासकीय नोकरभरती तसेच व्यावसायिक कर्जासाठी आवश्यक असलेले जात प्रमाणपत्र मिळविताना गाबीत समाजातील नागरिकांना अडचणी येत असल्याचे शिष्टमंडळाने जिल्हाधिकाऱ्यांच्या निदर्शनास आणून दिले. मालवण व सावंतवाडी येथील सेतू केंद्रांमार्फत तहसीलदार कार्यालयाकडे सादर केलेले अर्ज स्वीकारले जात नसल्याच्या तसेच विविध त्रुटींची कारणे देऊन अर्ज परत पाठविले जात असल्याच्या तक्रारीही यावेळी मांडण्यात आल्या.