मंदिर समितीतर्फे सत्कार; विकासकामांसाठी भाविकांनी पुढे येण्याचे आवाहन
जिंतूर येथील पुरातन काळातील श्री सिद्धेश्वर मंदिराच्या विकासासाठी सामाजिक बांधिलकी जपत उद्योजक व समाजसेवक सुनील भोंबे पाटील यांनी ₹4 लाख 21 हजारांची देणगी धनादेशाद्वारे मंदिर समितीकडे सुपूर्द केली. या उदात्त योगदानाबद्दल मंदिर समितीतर्फे त्यांचा शाल, श्रीफळ व पुष्पगुच्छ देऊन सत्कार करण्यात आला.यावेळी कार्यक्रमाच्या अध्यक्षस्थानी नागोराव जाधव होते. प्रमुख उपस्थितीत अॅड. विजयराव देशमुख, नगराध्यक्ष प्रताप देशमुख, नगर सेवक गोपाळ रोकडे, डॉ. दुर्गादास कानडकर, दत्तराव गाडेकर व गंगाप्रसाद घुगे, प.स. अध्यक्ष किशोर खिस्ते, यांची उपस्थिती होती. मान्यवरांच्या उपस्थितीत सुनील भोंबे पाटील यांनी मंदिर विकासासाठीचा धनादेश मंदिर समितीकडे सुपूर्द केला.
कार्यक्रमाचे प्रास्ताविक अॅड. विजयराव देशमुख यांनी केले. यावेळी नागोराव जाधव व नगराध्यक्ष प्रताप देशमुख यांनी मनोगत व्यक्त करत, श्री सिद्धेश्वर मंदिराच्या सर्वांगीण विकासासाठी भाविक व दानशूर व्यक्तींनी अशाच प्रकारे पुढाकार घ्यावा, असे आवाहन केले. भाविकांच्या सहकार्यामुळे मंदिरासह परिसराचाही विकास साधता येईल, असा विश्वास त्यांनी व्यक्त केला.
कार्यक्रमाचे आभार विष्णू गाडेकर यांनी मानले.कार्यक्रमास व्यापारी, मंदिर समितीचे सदस्य धनंजय जाधव , अनिल गाडेकर व भाविक मोठ्या संख्येने उपस्थित होते.