तासगाव हादरवणाऱ्या नवजात बाळाच्या अपहरणाचा अखेर निकाल; महिलेला ७ वर्षांची शिक्षा

तासगाव : तासगाव शहरातील सरस्वती आनंद हॉस्पिटल येथून एक दिवसाच्या नवजात पुरुष बाळाचे अपहरण केल्याप्रकरणी न्यायालयाने महिला आरोपीला दोषी ठरवत ७ वर्षांची शिक्षा सुनावली. या प्रकरणातील सहआरोपीची मात्र न्यायालयाने निर्दोष मुक्तता केली.
दि. २४ सप्टेंबर २०२२ रोजी सकाळी सुमारे ६ वाजता तासगाव येथील सिद्धेश्वर चौक परिसरातील सरस्वती आनंद हॉस्पिटल येथून नवजात पुरुष बाळाचे अपहरण करण्यात आले होते. याप्रकरणी बाळाची आई हर्षदा शरद भोसले, रा. चिंचणी, ता. तासगाव यांनी तासगाव पोलीस ठाण्यात फिर्याद दिली होती.
याप्रकरणी तासगाव पोलीस ठाण्यात गुन्हा रजिस्टर क्रमांक ३९५/२०२२ अन्वये भारतीय दंड संहिता कलम ३६३, ३०८, ३४ तसेच बाल न्याय अधिनियमातील संबंधित कलमांनुसार गुन्हा दाखल करण्यात आला होता.
तपासादरम्यान स्वाती छबुराव माने ऊर्फ स्वाती मच्छिंद्र पवार (वय ३8) रा. राष्ट्रमाता इंदिरानगर विद्यालयाच्या पाठीमागे, सिध्दार्थ नगर, मोहोळ, ता. मोहोळ, जि. सोलापूर. सध्या किर्लोस्करवाडी, ता. पलुस. हिच्यासह अन्य आरोपींची नावे समोर आली. पोलिसांनी तपास पूर्ण करून प्रकरण न्यायालयात दाखल केले.
न्यायालयीन सुनावणीनंतर स्वाती मच्छिंद्र पवार हिला दोषी ठरविण्यात आले. भारतीय दंड संहिता कलम ३६३ अंतर्गत ७ वर्षांचा साधा कारावास व ३ हजार रुपये दंड, दंड न भरल्यास २ महिने साधा कारावास, तसेच बाल न्याय अधिनियमाच्या कलम ७५ अन्वये ३ वर्षांचा सश्रम कारावास अशी शिक्षा सुनावण्यात आली. सदर शिक्षा एकत्रित भोगावयाच्या असल्याने आरोपीला एकूण ७ वर्षांचा कारावास भोगावा लागणार आहे.
दरम्यान, या प्रकरणातील सहआरोपी मच्छिंद्र पवार याची न्यायालयाने निर्दोष मुक्तता केली.
या प्रकरणात सरकारी पक्षातर्फे ॲड. एम. बी. कुलकर्णी व ॲड. ए. एम. साटविलकर यांनी काम पाहिले. प्रकरणाची सुनावणी मा. जिल्हा व अतिरिक्त सत्र न्यायाधीश डी. व्ही. निंबाळकर, सांगली यांच्या न्यायालयात झाली.
गुन्ह्याचा तपास पोलीस उपनिरीक्षक संदीप गुरव यांनी केला. न्यायालयीन कामकाजासाठी पैरवी अधिकारी सपोनि. मुहस्सर शेख यांनी काम पाहिले. सांगलीचे पोलीस अधीक्षक तुषार दोशी, अपर पोलीस अधीक्षक कल्पना बारवकर आणि स्थानिक गुन्हे अन्वेषण शाखेचे पोलीस निरीक्षक संजीव झाडे यांच्या मार्गदर्शनाखाली तपास व पुढील कार्यवाही करण्यात आली.