आटपाडी नगरपंचायतीचे नगराध्यक्ष यु. टी. जाधव यांनी शहरातील पारावर ज्येष्ठ नागरिकांची सदिच्छा भेट घेत त्यांच्याशी मनमोकळा संवाद साधला. यावेळी आटपाडी तालुक्यातील युवा उद्योजक यशवंत मेटकरी हे प्रमुख उपस्थित होते.
यावेळी नगराध्यक्ष जाधव यांनी शहरात सुरू असलेल्या विविध विकासकामांची माहिती देत, नागरिकांना दिलेली आश्वासने पूर्ण करण्यासाठी नगरपंचायत कटिबद्ध असल्याचे सांगितले. शहरातील खोकेधारक व फळविक्रेत्यांसाठी करण्यात आलेली सुविधा, तसेच सुरेश इंडियन गॅस एजन्सी शेजारी साकारण्यात येत असलेल्या 'नमो गार्डन' या उद्यानाच्या कामाची माहितीही त्यांनी ज्येष्ठ नागरिकांना दिली. हे उद्यान ज्येष्ठ नागरिक, महिला, बालक आणि सर्व नागरिकांसाठी विरंगुळ्याचे केंद्र ठरणार असल्याचे त्यांनी सांगितले.
यावेळी ज्येष्ठ नागरिकांनी शहरातील विकासकामांचे स्वागत करत काही सूचना मांडल्या. नगराध्यक्षांनी त्या सकारात्मकपणे स्वीकारून नागरिकांच्या अपेक्षा पूर्ण करण्यासाठी सातत्याने प्रयत्न सुरू राहतील, असे आश्वासन दिले.
या प्रसंगी कवडे गुरुजी, हणमंत राक्षे, मोकाशी काका, रावळ शेठ, पाटील काका, सपाटे साहेब यांच्यासह अनेक ज्येष्ठ नागरिक उपस्थित होते. उपस्थितांनी नगराध्यक्ष यु. टी. जाधव यांच्या लोकाभिमुख कार्यपद्धतीचे कौतुक करत आटपाडी शहराच्या सर्वांगीण विकासासाठी शुभेच्छा व्यक्त केल्या.
⚡ ब्रेकिंग NEWS