शारदा स्कूल भक्तीरसात न्हालं; पावसाच्या सरींमध्ये विठ्ठलनामाचा अखंड जयघोष

सोमैया विद्या विहार संचलित श्री शारदा इंग्लिश मीडियम स्कूल, शारदानगर येथे आषाढी एकादशी मोठ्या भक्तिभावाने आणि उत्साहपूर्ण वातावरणात साजरी करण्यात आली. यानिमित्त शाळेत विद्यार्थ्यांची भव्य दिंडी काढण्यात आली. विशेष म्हणजे, रिमझिम पावसाच्या सरी सुरू असतानाही बालगोपालांचा उत्साह किंचितही कमी झाला नाही. "ज्ञानोबा-तुकाराम", "पुंडलिक वरदा हरि विठ्ठल" आणि "माऊली माऊली" अशा अखंड नामघोषाने संपूर्ण परिसर भक्तीरसात न्हाऊन निघाला.वारकऱ्यांच्या पारंपरिक वेशभूषेत सजलेल्या विद्यार्थ्यांनी हातात टाळ, मृदंग, पखवाज आणि भगवे पताके घेऊन विठ्ठलभक्तीचा संदेश दिला. पावसाच्या सरी अंगावर झेलत बालवारकऱ्यांनी काढलेली दिंडी सर्वांचे लक्ष वेधून घेत होती. विद्यार्थ्यांच्या निरागस चेहऱ्यावरील भक्तिभाव, शिस्तबद्ध सहभाग आणि विठ्ठलनामाचा गजर यामुळे परिसरात पंढरपूरची अनुभूती निर्माण झाली.यावेळी शाळेचे प्राचार्य के. एल. वाकचौरे, उपप्राचार्या शुभांगी अमृतकर, पर्यवेक्षिका सौ. प्रज्ञा पहाडे, शिक्षिका पल्लवी ससाणे, नैथलीन फर्नांडिस तसेच सर्व शिक्षक व शिक्षकेतर कर्मचारी उपस्थित होते. त्यांनी विद्यार्थ्यांना आषाढी एकादशीचे महत्त्व, वारकरी संप्रदायाची समृद्ध परंपरा, संत ज्ञानेश्वर, संत तुकाराम यांच्या विचारांचा वारसा आणि विठ्ठलभक्तीचे संस्कार यांविषयी मार्गदर्शन केले.दिंडीदरम्यान विद्यार्थ्यांनी अभंग, भजन आणि विठ्ठलनामाचा अखंड जयघोष करत भक्तिमय वातावरण निर्माण केले. पावसाच्या सरी आणि विठ्ठलनामाचा निनाद यांचा अनोखा संगम अनुभवत उपस्थित पालक, शिक्षक आणि नागरिकही भारावून गेले. संस्कार, अध्यात्म आणि भारतीय सांस्कृतिक परंपरेची ओळख विद्यार्थ्यांना करून देणारा हा उपक्रम सर्वांच्या स्मरणात राहील, अशी भावना उपस्थितांनी व्यक्त केली.