महाराष्ट्राचे मुख्यमंत्री देवेंद्र फडणवीस यांच्या वाढदिवसानिमित्त तसेच स्वर्गीय अजितदादा पवार यांच्या जयंतीनिमित्त माण पंचायत समिती, दहिवडी येथे वृक्षारोपण व स्वच्छता अभियान उत्साहात पार पडले. पर्यावरण संवर्धनाचा संदेश देतानाच स्वच्छतेबाबत जनजागृती करण्याच्या उद्देशाने आयोजित करण्यात आलेल्या या उपक्रमाला अधिकारी, लोकप्रतिनिधी आणि कर्मचाऱ्यांचा उत्स्फूर्त प्रतिसाद लाभला.
कार्यक्रमाची सुरुवात पंचायत समिती परिसरात वृक्षारोपण करून करण्यात आली. त्यानंतर परिसरात साचलेला प्लास्टिक व इतर घनकचरा गोळा करून स्वच्छता करण्यात आली. परिसर स्वच्छ, सुंदर व प्रदूषणमुक्त ठेवण्याचा संकल्प यावेळी उपस्थितांनी व्यक्त केला.
या अभियानात पंचायत समितीचे सभापती विक्रम शिंगाडे, गटविकास अधिकारी प्रदीप शेंडगे, उपसभापती सौ. प्रियंकाताई जगदाळे, पंचायत समिती सदस्या गौरीताई तुपे, जिल्हा परिषद सदस्या शीतल रणपिसे, सहाय्यक गटविकास अधिकारी खाडे तसेच पंचायत समितीचे सर्व खाते प्रमुख,अधिकारी व कर्मचारी सहभागी झाले होते.
विशेष म्हणजे, सभापती विक्रम शिंगाडे आणि गटविकास अधिकारी प्रदीप शेंडगे यांच्या सह सर्व पदाधिकारी व अधिकारी यांनी स्वतः हातात झाडू व स्वच्छतेची साधने घेऊन अभियानात सक्रिय सहभाग नोंदविला. त्यांच्या या कृतीमुळे उपस्थित अधिकारी व कर्मचाऱ्यांमध्येही उत्साहाचे वातावरण निर्माण झाले.
यावेळी उपस्थित मान्यवरांनी स्वच्छता ही प्रत्येकाची सामूहिक जबाबदारी असून पर्यावरण संरक्षणासाठी अधिकाधिक वृक्ष लागवड करणे ही काळाची गरज असल्याचे सांगितले. सार्वजनिक ठिकाणी प्लास्टिकचा वापर टाळून स्वच्छ व हरित परिसर निर्माण करण्याचे आवाहनही करण्यात आले.
या उपक्रमामुळे पंचायत समिती परिसर अधिक स्वच्छ व सुशोभित झाला असून, "स्वच्छता आणि पर्यावरण संवर्धन हीच खरी समाजसेवा" असा संदेश या अभियानातून देण्यात आला. उपस्थितांनी या उपक्रमाचे स्वागत करत अशा सामाजिक उपक्रमांचे सातत्याने आयोजन व्हावे, अशी अपेक्षा व्यक्त केली.
⚡ ब्रेकिंग NEWS