आटपाडी तालुक्यातील जिल्हा परिषद प्राथमिक शाळा कटरेवाडी येथे विविध राष्ट्रीय, सामाजिक व शैक्षणिक विषयांचा समावेश असलेला 'पंचम कार्यक्रम' उत्साहात संपन्न झाला. या कार्यक्रमात स्व. अजितदादा पवार यांच्या जयंतीनिमित्त अभिवादन, महाराष्ट्र राज्य शिक्षक समितीच्या वर्धापन दिनानिमित्त मार्गदर्शन, मुख्यमंत्री देवेंद्र फडणवीस यांच्या वाढदिवसानिमित्त शुभेच्छा, राष्ट्रध्वज दिनानिमित्त माहिती तसेच जागतिक मेंदू दिनाचे महत्त्व विद्यार्थ्यांना सांगण्यात आले.
यावेळी विद्यार्थ्यांसाठी वकृत्व स्पर्धेचे आयोजन करण्यात आले. मार्गदर्शक शिक्षक श्री. नानासाहेब झुरे यांनी स्व. अजितदादा पवार यांच्या कार्याचा आढावा घेत त्यांच्या जनसामान्यांप्रती असलेल्या बांधिलकीची माहिती विद्यार्थ्यांना दिली. तसेच शिक्षक हे समाज घडवणारे शिल्पकार असून शिक्षणाचे महत्त्व विद्यार्थ्यांनी ओळखावे, असे आवाहन त्यांनी केले.
मुख्यमंत्री देवेंद्र फडणवीस यांच्या वाढदिवसानिमित्त त्यांच्या कार्यकाळातील जनहिताच्या निर्णयांची माहिती देण्यात आली. विद्यार्थ्यांना शिक्षणाविषयी गोडी निर्माण व्हावी तसेच शासनाच्या मोफत व सक्तीच्या शिक्षणासह विविध शैक्षणिक योजनांची माहितीही यावेळी देण्यात आली.
२२ जुलै १९४७ रोजी भारताच्या राष्ट्रध्वज 'तिरंगा'ला अधिकृत मान्यता मिळाल्याच्या ऐतिहासिक घटनेची माहिती विद्यार्थ्यांना देण्यात आली. तसेच जागतिक मेंदू दिनानिमित्त मेंदूचे कार्य, त्याचे आरोग्य आणि सुरक्षिततेचे महत्त्व याविषयी मार्गदर्शन करण्यात आले.
कार्यक्रमाच्या निमित्ताने विद्यार्थ्यांना खाऊ व शालेय उपयोगी लेखन साहित्याचे वाटप करण्यात आले. तसेच शाळा परिसरात वृक्षारोपण करून प्रत्येक विद्यार्थ्याने आपल्या घरी किमान दोन झाडे लावण्याचा संकल्प केला.
या कार्यक्रमाचे आयोजन व नियोजन श्री. नानासाहेब झुरे यांनी केले. कार्यक्रमाला शाळेतील विद्यार्थी, शिक्षक, अंगणवाडी सेविका, पालक व ग्रामस्थ मोठ्या संख्येने उपस्थित होते. कार्यक्रमाच्या शेवटी अंगणवाडी सेविका शोभा मोटे यांनी उपस्थितांचे आभार मानले.
⚡ ब्रेकिंग NEWS