सोलापूर जिल्ह्यात विशेष लोकअदालतीला यश

सोलापूर, दि. १८ जुलै २०२६: महाराष्ट्र राज्य विधी सेवा प्राधिकरण, मुंबई यांच्या निर्देशानुसार व जिल्हा विधी सेवा प्राधिकरण सोलापूरचे अध्यक्ष तथा प्रमुख जिल्हा व सत्र न्यायाधीश मनोज शर्मा यांच्या मार्गदर्शनाखाली सोलापूर जिल्ह्यात धनादेश अनादर (Cheque Bounce) प्रकरणांसाठी विशेष लोकअदालतीचे आयोजन करण्यात आले होते. या लोकअदालतीतून एकूण ३ कोटी ७० लाख ५७ हजार ४३७ रुपये इतके मूल्य असलेली १४६ प्रकरणे तडजोडीने निकाली निघाली.

परक्राम्य संलेख अधिनियम १९८१ (Negotiable Instruments Act) अंतर्गत दाखल प्रकरणांचा जलद, सुलभ आणि सामंजस्यपूर्ण मार्गाने निपटारा करण्यासाठी ही विशेष लोकअदालत घेण्यात आली. न्यायालयात प्रलंबित असलेल्या व तडजोडीची शक्यता असलेल्या प्रकरणांमध्ये दोन्ही पक्षांच्या परस्पर संमतीने तोडगा काढण्यात आला.

जुनी प्रकरणे मार्गी:
निकाली काढण्यात आलेल्या १४६ प्रकरणांपैकी २० वर्षांपेक्षा जुने १ प्रकरण तर १० वर्षांपेक्षा जास्त कालावधीची १४ प्रकरणे सामंजस्याने निकाली निघाली.

*जिल्हाभर आयोजन:*
सोलापूर मुख्यालयासाठी सेवानिवृत्त न्यायाधीश व्ही. आर. दासरी यांनी पॅनल प्रमुख म्हणून तर विधिज्ञ व्ही. व्ही. कुर्ले यांनी पॅनल सदस्य म्हणून काम पाहिले. जिल्ह्यातील सर्व तालुका विधी सेवा समितीच्या ठिकाणीही विशेष लोकअदालतीचे आयोजन करण्यात आले होते. संपूर्ण जिल्ह्यातून एकूण १० पॅनल स्थापन करण्यात आले होते.

लोकअदालत यशस्वी करण्यासाठी जिल्हा विधी सेवा प्राधिकरणाचे सचिव यांच्या देखरेखीखाली जिल्हा विधी सेवा प्राधिकरणाचे कर्मचारी, पॅनल विधिज्ञ तसेच न्यायालयीन कर्मचाऱ्यांनी परिश्रम घेतले.

लोकअदालतीची आकडेवारी:
- एकूण ठेवलेली प्रकरणे: ३३६७
- एकूण तडजोड झालेली प्रकरणे: १४६
- एकूण तडजोड रक्कम:३,७०,५७,४३७/- रुपये

तालुकानिहाय तडजोड झालेली प्रकरणे:
- सोलापूर: ४८ प्रकरणे, रक्कम रु. २,१४,३१,९६०/-
- सांगोला:३० प्रकरणे, रक्कम रु. ३०,५९,७००/-
- बार्शी: १८ प्रकरणे, रक्कम रु. १६,८५,१४३/-
- पंढरपूर: १७ प्रकरणे, रक्कम रु. ४१,२८,९९७/-
- माळशिरस:१४ प्रकरणे, रक्कम रु. १६,७९,७४९/-
- मंगळवेढा: ०८ प्रकरणे, रक्कम रु. २८,२५,३४६/-
- मोहोळ: ०४ प्रकरणे, रक्कम रु. ६,०२,८३१/-
- अक्कलकोट:०३ प्रकरणे, रक्कम रु. २,२३,४११/-
- करमाळा: ०३ प्रकरणे, रक्कम रु. १०,७०,३००/-
- माढा: ०१ प्रकरण, रक्कम रु. ३,५०,०००/-