देवगड हायस्कूलमध्ये विद्यार्थी स्वराज्य सभा निवडणुक उत्साहात

देवगड प्रतिनिधी : शेठ म. ग. हायस्कूल, देवगड येथे शैक्षणिक वर्ष २०२६-२७ साठी विद्यार्थी स्वराज्य सभा निवडणुक उत्साहात पार पडली. शाळेमध्ये विद्यार्थी लोकशाही मूल्यांची जोपासना व्हावी, नेतृत्वगुण विकसित व्हावेत आणि विद्यार्थ्यांना निवडणूक प्रक्रियेची प्रत्यक्ष माहिती मिळावी या उद्देशाने या निवडणुकीचे आयोजन करण्यात आले होते.
या निवडणुकीत विद्यार्थिनी प्रतिनिधी, वर्ग प्रतिनिधी तसेच शालेय मंत्रिमंडळातील विविध पदांसाठी मतदान होणार आहे. निवडणूक आयोगाच्या धर्तीवर मतदार यादी, उमेदवारी अर्ज, प्रचार, मतदान आणि मतमोजणी ईव्हीएम मशीन ॲपव्दारे अशा सर्व प्रक्रिया राबविण्यात आल्या.
सार्वत्रिक निवडणुकांमध्ये ज्याप्रमाणे मतदान प्रक्रिया चालते त्याचप्रमाणे सर्व व्यवस्था करण्यात आलेली होती. यामध्ये केंद्राध्यक्ष, मतदान अधिकारी, उमेदवारांचे प्रतिनिधी, उमेदवार, बोटाला शाई लावणे, उमेदवारांचे अनुमोदक या सर्व भूमिका विद्यार्थ्यांनी पार पाडल्या. विद्यार्थ्यांनी प्रत्यक्ष मतदान कक्षामध्ये जाऊन ईव्हीएम ॲपद्वारे आपले मत दिले. सर्व मतदारांना चिठ्ठ्या देखील देण्यात आलेल्या होत्या. त्यामुळे विद्यार्थ्यांमध्ये मोठा उत्साहाचे वातावरण होते.
हा उपक्रम यशस्वी होण्यासाठी मुख्याध्यापक श्री प्रविण खडपकर, पर्यवेक्षिका सौ. निशा दहिबावकर आणि निवडणूक विभाग समिती मधील श्री राजेंद्र कोयंडे, श्री सुरेश पवार, सो आफरीन पठाण, श्री. प्रसाद शेवडे आणि श्री उमेश कोयंडे याने विशेष मेहनत घेऊन हा नाविन्यपूर्ण उपक्रम यशस्वी करून विद्यार्थ्यांना मतदान प्रक्रियेची प्रत्यक्ष अनुभूती दिली. शाळेने राबविलेल्या या उपक्रमाचे सर्व स्तरातून कौतुक करण्यात येत आहे.
या उपक्रमातून विद्यार्थ्यांना लोकशाही मूल्ये, जबाबदारीची जाणीव आणि नेतृत्वगुण विकसित करण्याची संधी मिळणार असल्याचे शाळा प्रशासनाने सांगितले.