प्रांत कार्यालयावरून कवठेमहांकाळात राजकीय स्फोट!; "जनतेची दिशाभूल थांबवा, अन्याय खपवून घेणार नाही" – भाजप तालुकाध्यक्ष उदयराजे भोसले यांचा सरकारला थेट इशारा, आमदार रोहित पाटील यांच्यावर घणाघाती हल्लाबोल

कवठेमहांकाळ तालुक्यासाठी प्रस्तावित प्रांत कार्यालय तासगाव येथे हलविण्याच्या चर्चेला आता राजकीय रंग चढला असून, भाजपचे तालुकाध्यक्ष उदयराजे भोसले यांनी या प्रस्तावाला तीव्र विरोध दर्शविला आहे. "कवठेमहांकाळच्या जनतेवर अन्याय खपवून घेतला जाणार नाही," असा इशारा देत त्यांनी महसूल मंत्री चंद्रशेखर बावनकुळे आणि पालकमंत्री चंद्रकांत पाटील यांची भेट घेऊन तालुक्याची वस्तुस्थिती आणि जनतेच्या भावना मांडल्या. मंत्र्यांनी विषयाची गांभीर्याने दखल घेत योग्य कार्यवाहीचे आश्वासन दिल्याचे भोसले यांनी सांगितले.
भोसले म्हणाले की, प्रांत कार्यालय तासगाव येथे गेल्यास तालुक्याच्या शेवटच्या टोकावरील नागरिकांना सुमारे ८० किलोमीटरपेक्षा अधिकचा प्रवास करावा लागेल. तर जिल्हाधिकारी कार्यालय, जिल्हा न्यायालय, पोलीस अधीक्षक कार्यालय, सिंचन विभाग आणि प्रमुख शासकीय कार्यालये सांगली–मिरज येथे असल्याने जनतेची मोठी गैरसोय होईल.
यावेळी त्यांनी आमदार रोहित पाटील यांच्यावरही टीका करत, शासनासमोर चुकीचे चित्र उभे करून तालुक्याची दिशाभूल केल्याचा आरोप केला. "तालुक्याच्या स्वाभिमानाशी तडजोड केली जाणार नाही. जनहिताविरोधातील कोणत्याही निर्णयाविरोधात रस्त्यावर उतरून तीव्र आंदोलन केले जाईल," असा इशाराही त्यांनी दिला.
यावेळी जिल्हा सरचिटणीस अनिल लोंढे, एस.आर. प्रमुख धनंजय शिंदे, युवा मोर्चा जिल्हा उपाध्यक्ष नारायण बंडगर, विजय सूर्यवंशी, सोशल मीडिया प्रमुख सचिन भोसले, चिटणीस सचिन गायकवाड आणि राजाराम पाटील उपस्थित होते.