सोलापूर विभागातील पोस्ट ऑफिस योजनांमध्ये मोठी गुंतवणूक आरडी आणि टीडी खात्यांच्या संख्येत विक्रमी वाढ

सुरक्षित आणि हमीभाव परतावा देणारी गुंतवणूक म्हणून आजही सर्वसामान्य नागरिक पोस्ट ऑफिसच्या बचत योजनांना पहिली पसंती देत असल्याचे चित्र समोर आले आहे. उपलब्ध झालेल्या अधिकृत आकडेवारीनुसार, सोलापूर विभागांतर्गत आर्थिक वर्ष २०२४-२५ च्या तुलनेत आर्थिक वर्ष २०२५-२६ मध्ये आवर्ती ठेव आणि मुदत ठेव खात्यांच्या संख्येत लक्षणीय आणि विक्रमी वाढ झाली आहे. नागरिक मोठ्या प्रमाणावर पोस्टाच्या योजनांकडे आकर्षित होत असल्याचे यावरून स्पष्ट होते.
आर्थिक वर्ष २०२४-२५ मध्ये सोलापूर विभागात एकूण ३९,२५४ आरडी खाती उघडण्यात आली होती. या संख्येत पुढील आर्थिक वर्षात (२०२५-२६) मोठी वाढ होऊन हा आकडा थेट ४९,८६३ वर पोहोचला आहे. मध्यम आणि अल्प उत्पन्न गटातील नागरिकांमध्ये दरमहा ठराविक रक्कम बचत करण्याची क्रेझ वाढल्याचे हे लक्षण आहे.
१ वर्षाच्या मुदत ठेव योजनेला नागरिकांनी सर्वाधिक पसंती दिली आहे. २०२४-२५ मध्ये या योजनेची १४,३६० खाती होती, तर २०२५-२६ मध्ये यामध्ये जवळपास दुपटीने वाढ होऊन हा आकडा २५,०८१ वर गेला आहे.
सोलापूर विभागातील गुंतवणुकीची आकडेवारी
| योजना | आर्थिक वर्ष २०२४-२५ | आर्थिक वर्ष २०२५-२६
आवर्ती ठेव | ३९,२५४ | ४९,८६३ |
१ वर्षाची मुदत ठेव | १४,३६० | २५,०८१
२ वर्षांची मुदत ठेव| २,०७९ | ५,३९१ |
३ वर्षांची मुदत ठेव | ६५८ | १,३३१ |
५ वर्षांची मुदत ठेव | ३,९०८ | ७,०२० |
बँकांपेक्षा सुरक्षितता आणि चांगला परतावा
शेअर बाजारातील चढ-उतार आणि इतर खाजगी वित्तीय संस्थांमधील जोखीम पाहता, सोलापूर जिल्ह्यातील नागरिक सुरक्षित गुंतवणुकीसाठी पोस्ट ऑफिसच्या पारंपरिक योजनांवर अधिक विश्वास ठेवत असल्याचे या आकडेवारीवरून सिद्ध होते.