कराड शहरातील बसस्थानक परिसरात महिलेचे मंगळसूत्र हिसकावून पळ काढणाऱ्या पती-पत्नीला कराड शहर पोलिसांनी अवघ्या एका दिवसात अटक करत गुन्ह्याची यशस्वी उकल केली. या कारवाईत आरोपींकडून सुमारे दीड लाख रुपये किमतीचे सात ग्रॅम वजनाचे सोन्याचे मंगळसूत्र जप्त करण्यात आले असून, चौकशीत त्यांच्याकडून आणखी तीन जबरी चोरीचे गुन्हे उघडकीस आले आहेत.
राजेश कांबळे (वय ३३) व त्याची पत्नी पूनम श्रावण कांबळे (वय २७) दोघेही रा. कराड अशी पोलिसांनी ताब्यात घेतलेल्यांची नावे आहेत.
याबाबत पोलिसांनी दिलेली माहिती अशी की, २२ जून रोजी रात्री सुमारे ९.२० वाजण्याच्या सुमारास फिर्यादी महिला नवग्रह मंदिराकडून एसटी बसस्थानकाच्या दिशेने पायी जात असताना एका महिला व तिच्या साथीदाराने त्यांना अडविले. जीवे मारण्याची धमकी देत महिलेच्या गळ्यातील मंगळसूत्र हिसकावून त्यांना ढकलून देत दोघांनी घटनास्थळावरून पलायन केले होते. याप्रकरणी कराड शहर पोलीस ठाण्यात गुन्हा दाखल करण्यात आला होता.
गुन्ह्याचा तपास करताना पोलिसांनी बसस्थानक परिसरातील सीसीटीव्ही फुटेजची बारकाईने तपासणी केली. त्यामध्ये संशयित महिला व पुरुष घटनास्थळाजवळ संशयास्पद हालचाली करताना आढळले. तांत्रिक तपास आणि गोपनीय माहितीच्या आधारे श्रावण राजेश कांबळे व त्याची पत्नी पूनम श्रावण कांबळे यांना २३ जून रोजी अटक करण्यात आली.
पोलीस कोठडीत चौकशीदरम्यान आरोपींनी गुन्ह्याची कबुली दिली. त्यांच्या माहितीनुसार चोरीस गेलेले दीड लाख रुपये किमतीचे सोन्याचे मंगळसूत्र जप्त करण्यात आले. पुढील तपासात या दोघांनी कराड शहर पोलीस ठाण्याच्या हद्दीत अशाच प्रकारचे आणखी तीन गुन्हे केल्याचेही समोर आले आहे. त्यामुळे एकूण चार गुन्ह्यांची उकल झाली असून, उर्वरित मुद्देमाल हस्तगत करण्यासाठी तपास सुरू आहे.
⚡ ब्रेकिंग NEWS