तासगावात 'कॅफे संस्कृती'चा विळखा; अल्पवयीन मुला-मुलींच्या वाढत्या राबत्यामुळे नागरिकांत चिंतेचे वातावरण.

तासगाव शहरासह ग्रामीण भागातील शाळा-महाविद्यालये सुरू झाली असून, सध्या कॉलेजच्या नावाखाली अनेक अल्पवयीन मुले-मुली अभ्यासाऐवजी शहरातील आडोशाला असलेल्या आणि गल्लीबोळातील कॅफेचा आश्रय घेत असल्याचे समोर आले आहे. या कॅफेमध्ये युवक-युवतींचा वाढता राबता आणि तिथल्या गैरप्रकारांमुळे स्थानिकांना नाहक त्रासाला सामोरे जावे लागत आहे. त्यामुळे या प्रकाराचा बंदोबस्त करून अल्पवयीन मुला-मुलींना बिघडण्यापासून वाचवण्यासाठी पोलिसांनी कठोर कारवाई करावी, अशी मागणी नागरिक करत आहेत.
​नेमका प्रकार काय?
शाळा-कॉलेजला जाण्याच्या वेळेत अनेक विद्यार्थी वर्ग आपल्या वर्गाला दांडी मारून शहरातील गुप्त ठिकाणी असणाऱ्या कॅफेमध्ये वेळ घालवत आहेत. या कॅफेमध्ये असणारी खाजगी जागा आणि अंधुक प्रकाश व्यवस्था यांमुळे अल्पवयीन मुले-मुली मोठ्या प्रमाणावर आकर्षित होत आहेत. या ठिकाणांचा वापर 'टाईमपास'साठी होत असून, यामुळे शहराच्या सामाजिक वातावरणावर विपरीत परिणाम होत असल्याचे स्थानिकांचे म्हणणे आहे.
​स्थानिकांचा संताप
स्थानिक नागरिकांनी दिलेल्या माहितीनुसार, या कॅफेमधील गोंधळ आणि गर्दीमुळे परिसरातील रहिवाशांना उपद्रव सहन करावा लागत आहे. अनेक ठिकाणी ही कॅफे निवासी वस्तीत किंवा गल्लीबोळात असल्याने महिला व ज्येष्ठ नागरिकांना तिथून ये-जा करताना संकोच वाटत आहे. "ही मुले अजून अल्पवयीन आहेत. अशा ठिकाणी वेळ घालवल्याने त्यांचे शैक्षणिक भवितव्य तर धोक्यात येत आहेच, पण त्यासोबतच समाजात चुकीच्या प्रथांना खतपाणी मिळत आहे," अशी प्रतिक्रिया एका पालकाने व्यक्त केली.
​पोलिसांकडून कारवाईची अपेक्षा
शहरातील वाढत्या 'कॅफे संस्कृती'वर आळा घालण्यासाठी पोलीस प्रशासनाने पुढाकार घ्यावा, अशी मागणी जोर धरत आहे. ज्या कॅफेमध्ये अल्पवयीन मुले-मुली आढळतात, त्या चालकांवर कडक कायदेशीर कारवाई करावी, तसेच शाळा-कॉलेजच्या वेळेत या ठिकाणांची झाडाझडती घ्यावी, जेणेकरून विद्यार्थ्यांमध्ये जरब बसेल आणि त्यांना योग्य मार्गावर आणता येईल, असे आवाहन नागरिकांनी केले आहे.
​आता पोलीस प्रशासन या गंभीर विषयाची दखल घेऊन काय पावले उचलते, याकडे संपूर्ण तासगावकऱ्यांचे लक्ष लागले आहे.