नाझरे येथे शिक्षक नेते अशोक पाटील यांचा सेवापूर्ती सोहळा संपन्न

नाझरे, ता. सांगोला : जिल्हा परिषद सोलापूरच्या शिक्षण विभागात तब्बल ३६ वर्षे प्रामाणिक, निष्ठावान व उल्लेखनीय सेवा बजावून सेवापूर्ती झालेल्या शिक्षक नेते तथा माजी मुख्याध्यापक अशोक आण्णाप्पा पाटील (गुरुजी) यांच्या सेवापूर्ती निमित्त आयोजित भव्य सत्कार व सन्मान सोहळा गुरुवारी सायंकाळी नाझरे येथील ग्रामपंचायत बाजार पटांगणात उत्साहपूर्ण वातावरणात संपन्न झाला.

कार्यक्रमाच्या अध्यक्षस्थानी माजी आमदार डॉ. बाबासाहेब देशमुख होते. प्रमुख पाहुणे म्हणून दिपक आबा साळुंखे-पाटील, चेतनसिंह केदार तसेच डॉ. अनिकेत देशमुख उपस्थित होते.

यावेळी मान्यवरांनी आपल्या मनोगतातून अशोक पाटील यांनी शिक्षक, मुख्याध्यापक आणि शिक्षक संघटनेचे नेते म्हणून केलेल्या उल्लेखनीय कार्याचा गौरव केला. ग्रामीण भागातील विद्यार्थ्यांच्या शैक्षणिक प्रगतीसाठी त्यांनी दिलेले योगदान, शिक्षकांच्या विविध प्रश्नांसाठी केलेला संघर्ष तसेच सामाजिक क्षेत्रातील त्यांची सक्रिय भूमिका याबद्दल वक्त्यांनी गौरवोद्गार काढले.

कार्यक्रमात विविध क्षेत्रातील मान्यवर, लोकप्रतिनिधी, शिक्षक बांधव, सामाजिक कार्यकर्ते आणि ग्रामस्थांच्या उपस्थितीत अशोक पाटील यांचा शाल, श्रीफळ, पुष्पगुच्छ व स्मृतिचिन्ह देऊन सत्कार करण्यात आला. उपस्थितांनी टाळ्यांच्या कडकडाटात त्यांना भावी आयुष्यासाठी शुभेच्छा दिल्या.

या सोहळ्यास परिसरातील विविध गावांतील शिक्षक, शिक्षणप्रेमी नागरिक, ग्रामपंचायत पदाधिकारी तसेच सर्वपक्षीय नेतेमंडळी मोठ्या संख्येने उपस्थित होती. कार्यक्रमाचे नियोजन व संयोजन उत्कृष्टरीत्या पार पडले.