आटपाडीच्या गुणवंत विद्यार्थ्यांचा मुंबई आयकर उपायुक्त सचिन मोटे यांच्या हस्ते गौरव

आटपाडी तालुक्यातील एस.एस.सी परीक्षा 2026 मध्ये प्रथम, द्वितीय व तृतीय क्रमांक प्राप्त करून उल्लेखनीय यश संपादन करणाऱ्या विद्यार्थी व विद्यार्थिनींचा मुंबई येथील आयकर उपायुक्त सचिन मोटे यांच्या हस्ते सत्कार व सन्मान करण्यात आला. या प्रेरणादायी कार्यक्रमास साध्य फाउंडेशनच्या संस्थापक अध्यक्षा विद्याताई मोटे यांची प्रमुख उपस्थिती लाभली.
यावेळी मार्गदर्शन करताना सचिन मोटे यांनी विद्यार्थ्यांनी आपल्या पुढील करिअरचे योग्य नियोजन कसे करावे, शिक्षणाला जीवनात किती महत्त्व द्यावे आणि शिक्षणामुळे व्यक्तिमत्त्वासोबत समाजात मोठे परिवर्तन कसे घडू शकते याबाबत प्रेरणादायी विचार मांडले. त्यांनी विद्यार्थ्यांना मोठी स्वप्ने पाहून त्यासाठी कठोर परिश्रम करण्याचे आवाहन केले.
विद्याताई मोटे यांनी देखील विद्यार्थ्यांशी संवाद साधत शिक्षणाचे महत्त्व अधोरेखित केले. ग्रामीण भागातील विद्यार्थ्यांना दर्जेदार शिक्षण मिळावे यासाठी साध्य फाउंडेशनतर्फे राबविण्यात येणाऱ्या विविध शैक्षणिक उपक्रमांचा व मदतीचा आढावा त्यांनी यावेळी उपस्थितांसमोर मांडला.
गुणवंत विद्यार्थ्यांचा गौरव सोहळा उत्साहपूर्ण वातावरणात पार पडला. विद्यार्थ्यांसह पालक व नागरिकांनी कार्यक्रमास उत्स्फूर्त प्रतिसाद दिला.