विजेच्या धक्क्याने सुप्रसिद्ध घोड्याचा मृत्यू घटनेची नगराध्यक्ष यू. टी. जाधव यांच्याकडून गंभीर दखल

आटपाडी : शहरातील साठे नगर परिसरात तार तुटून झालेल्या विजेच्या धक्क्यामुळे रवी लांडगे यांचा सुप्रसिद्ध घोडा मृत्युमुखी पडल्याची दुर्दैवी घटना घडली. या घटनेची गंभीर दखल घेत आटपाडीचे नगराध्यक्ष माननीय यू. टी. जाधव यांनी महाराष्ट्र राज्य विद्युत महावितरणचे अधिकारी राजेश डावरे यांच्याशी संपर्क साधून संबंधित ठिकाणी तातडीने आवश्यक उपाययोजना करण्याच्या सूचना दिल्या.
तसेच पशुवैद्यकीय दवाखान्याचे डॉक्टर सोमेश्वर गाढवे यांना देखील आवश्यक सहकार्य करण्याबाबत सूचित करण्यात आले. भविष्यात अशा प्रकारच्या दुर्घटना घडू नयेत यासाठी वीज यंत्रणेची तपासणी करून सुरक्षेच्या दृष्टीने योग्य कार्यवाही करण्यात यावी, अशी मागणी नगराध्यक्ष जाधव यांनी केली.
मृत्युमुखी पडलेला घोडा हा विविध सामाजिक, धार्मिक व सांस्कृतिक कार्यक्रमांमध्ये आकर्षणाचे केंद्र होता. या घटनेमुळे लांडगे कुटुंबावर दुःखाचा डोंगर कोसळला असून, त्यांना शासकीय मदत व आवश्यक सहकार्य मिळवून देण्यासाठी प्रयत्नशील राहणार असल्याचे आश्वासन नगराध्यक्ष यू. टी. जाधव यांनी दिले.