सलून मधील कामगार मारहाण प्रकरणी कणकवलीतील ६ जणांसह अन्य युवकांवर गुन्हा दाखल

कणकवली येथील भवानी कॉम्प्लेक्स
परिसरात दोन मुलींची छेड काढल्याच्या प्रकारातून झालेल्या वादानंतर बेकायदेशीर जमाव करून मारहाण केल्याप्रकरणी कणकवली पोलिस ठाण्यात सात जणांसह इतरांविरोधात गुन्हा दाखल करण्यात आला आहे. याबाबतची फिर्याद पुनम महेश मिठबावकर (वय ३८, रा. दांडी, मालवण) यांनी दिली आहे. त्यानुसार, दिनांक १५ मे रोजी दुपारी २.३० ते सायंकाळी ५ वाजण्याच्या दरम्यान कणकवली येथील भवानी कॉम्प्लेक्स, तेलीआळी परिसरात हा प्रकार घडला. फिर्यादी यांच्या दुकानातील दोन कामगारांनी दोन मुलींची छेड काढल्याचा आरोप आहे. या घटनेचा राग मनात धरून आरोपींनी संबंधित कामगार ज्या खोलीत राहत होते तेथे जाऊन त्यांना मारहाण केली. त्यानंतर त्या कामगारांना फिर्यादी यांच्या परिसरातील दुकानांमध्ये आणून पुन्हा मारहाण करण्यात आली. तसेच फिर्यादी यांना शिवीगाळ करून जीवे मारण्याची धमकी दिल्याचे फिर्यादीत नमूद करण्यात आले आहे. या प्रकरणी मिथिलेश भंडारी, मिथुन ठाणेकर, गौरव हर्णे, सुनील निकम, राजू निकम, प्रशांत तेली तसेच छेड काढण्यात आलेल्या दोन मुली आणि त्यांच्यासोबत असलेल्या इतर व्यक्तींविरोधात गुन्हा नोंद करण्यात आला आहे. या प्रकरणी विविध कलमान्वये गुन्हा दाखल करण्यात आला आहे.