महाडीबीटीवरील अनुसूचित जाती विद्यार्थ्यांच्या प्रलंबित अर्जांसाठी 26 मे रोजी विशेष कार्यशाळा

सोलापूर, दि. २२ : महाडीबीटी पोर्टलवर सन २०१९-२० ते २०२५-२६ या कालावधीतील अनुसूचित जाती प्रवर्गातील विद्यार्थ्यांचे प्रलंबित शिष्यवृत्ती अर्ज निकाली काढण्यासाठी सोमवार, दि. २६ मे २०२६ रोजी एक दिवसीय विशेष कार्यशाळेचे आयोजन करण्यात आले आहे. ही कार्यशाळा डॉ. बाबासाहेब आंबेडकर सामाजिक न्याय भवन, सोलापूर येथे होणार असल्याची माहिती सहाय्यक आयुक्त समाज कल्याण कार्यालयाच्या वतीने देण्यात आली.

सहाय्यक आयुक्त श्रीमती सुलोचना सोनवणे यांनी सांगितले की, विद्यार्थ्यांच्या शिष्यवृत्ती अर्जांतील प्रलंबित प्रकरणे तातडीने मार्गी लावण्यासाठी ही कार्यशाळा आयोजित करण्यात आली आहे. संबंधित महाविद्यालयांचे प्राचार्य तसेच शिष्यवृत्ती कामकाज पाहणारे कर्मचारी यांनी आवश्यक कागदपत्रांसह उपस्थित राहावे, असे आवाहन करण्यात आले आहे.

महाडीबीटी पोर्टलवरील रखडलेले अर्ज निकाली निघाल्यास अनेक विद्यार्थ्यांना शिष्यवृत्तीचा लाभ मिळण्याचा मार्ग मोकळा होणार आहे. त्यामुळे संबंधित संस्थांनी वेळेत उपस्थित राहून प्रशासनास सहकार्य करावे, असेही आवाहन समाज कल्याण विभागाकडून करण्यात आले आहे.