सोलापूर जिल्ह्यात 163 (1) कलम अन्वये डॉल्बी व लेझर लाईट वापरास बंदी

सोलापूर, दि. २२ : मोहरम सणाच्या पार्श्वभूमीवर सार्वजनिक कार्यक्रम व मिरवणुकांमध्ये डॉल्बी सिस्टीम तसेच लेझर लाईटच्या वापरामुळे नागरिकांच्या आरोग्य व सुरक्षिततेस धोका निर्माण होण्याची शक्यता लक्षात घेऊन जिल्हादंडाधिकारी कार्तिकेयन एस. (भा.प्र.से.) यांनी सोलापूर जिल्ह्यात अशा साधनांच्या वापरास प्रतिबंध करणारा आदेश जारी केला आहे.
भारतीय नागरिक सुरक्षा संहिता २०२३ चे कलम १६३ (१) अन्वये हा आदेश लागू करण्यात आला असून, दि. १६ जून २०२६ ते २६ जून २०२६ या कालावधीत सोलापूर जिल्ह्यातील सर्व सार्वजनिक उत्सव मंडळांकडून आयोजित कार्यक्रम व मिरवणुकांमध्ये डॉल्बी सिस्टीम आणि लेझर लाईट शो/वापरास बंदी राहणार आहे.
मोठ्या आवाजातील डॉल्बी सिस्टीममुळे काही नागरिकांना कान व छातीचे गंभीर त्रास होण्याची शक्यता असून, लेझर लाईटमुळे विशेषतः लहान मुले व ज्येष्ठ नागरिकांच्या डोळ्यांना इजा होऊ शकते. याबाबत विविध सामाजिक संघटना व नागरिकांकडून प्रशासनाकडे निवेदने प्राप्त झाली होती.

सार्वजनिक सुव्यवस्था, नागरिकांची सुरक्षितता आणि आरोग्याच्या दृष्टीने हा निर्णय घेण्यात आला असून, दिनांक 16 जून 2016 ते 26 जून 2026 या कालावधीत सोलापूर जिल्ह्यामध्ये सार्वजनिक उत्सव मंडळाकडून आयोजित कार्यक्रम मिरवणुकीमध्ये डॉल्बी सिस्टीम लेझर लाईट शो चा वापर करणे भारतीय नागरिक सुरक्षा संहिता 2023 चे कलम 163 (1) नुसार प्रतिबंध करण्यात येत आहे. आदेशाचे उल्लंघन करणाऱ्या व्यक्तींवर कायदेशीर व फौजदारी कारवाई करण्यात येईल.