वनगळी येथे महिलेसह कुटुंबीयांवर हल्ला; मंगळसूत्र हिसकावल्याची तक्रार

तालुक्यातील वनगळी येथे पोलीस पंचनामा सुरु असताना वाद घालून एकाने महिलेसह तिच्या कुटुंबीयांवर हल्ला करुन महिलेच्या गळ्यातील अर्धा तोळ्याचे सोन्याचे मंगळसूत्र हिसकावून नेल्याची घटना गुरुवारी ( दि.११) सायंकाळी घडली. महिलेने दिलेल्या फिर्यादीवरुन आरोपीवर इंदापूर पोलीस ठाण्यात गुन्हा दाखल करण्यात आला आहे.
सोमनाथ नामदेव चव्हाण ( रा.वनगळी, ता.इंदापूर) असे आरोपीचे नाव आहे. अर्चना अतुल सोनकांबळे (वय ३६ वर्षे, रा.वनगळी) असे तक्रारदार महिलेचे नाव आहे.
पोलीसांनी सांगितले की,अर्चना सोनकांबळे, त्यांचे पती अतुल सोनकांबळे व मुलगा आर्यन हे घरी असताना बावधन पोलीस ठाण्याच्या महिला सहाय्यक पोलीस निरीक्षक शितल गिरी व पोलीस कर्मचारी पंचनामा करण्यासाठी त्यांच्या घरी आले होते. त्यावेळी गावातील सोमनाथ नामदेव चव्हाण हा तेथे आला. त्याला निघून जाण्यास सांगितल्याने त्याने शिवीगाळ करण्यास सुरुवात केली.
वाद वाढल्यानंतर सोमनाथ चव्हाण याने अर्चना सोनकांबळे यांना थप्पड मारून दगडाने खांदा व पाठीवर मारहाण केली. तिला सोडवण्यासाठी आलेल्या मुलगा आर्यन याला लाथाबुक्क्यांनी तर पती अतुल सोनकांबळे यांना दगडाने मारून दुखापत केली व माझा भाऊ किरण बाळु चव्हाण हा जेल मधून सुटुन आल्यानंतर तुम्हाला बघुन घेऊ अशी धमकी दिली असे तक्रारीत नमूद आहे.
मारहाणीदरम्यान अर्चना सोनकांबळे यांच्या गळ्यातील अर्धा तोळ्याचे सोन्याचे मणीमंगळसूत्र हिसकावून घेतल्याचा आरोप फिर्यादीमध्ये करण्यात आला आहे. घटनेनंतर डायल ११२ वर संपर्क साधून पोलीस मदत मागवण्यात आली. जखमींवर उपजिल्हा रुग्णालय, इंदापूर येथे उपचार करण्यात आले आहेत. इंदापूर पोलीस पुढील तपास करीत आहेत