नडगीवे नं. १ शाळेत आंतरराष्ट्रीय योग दिन उत्साहात साजरा; कृषीदूतांच्या सहभागाने विद्यार्थ्यांना योगाचे महत्त्व पटवून दिले

जिल्हा परिषद पूर्व प्राथमिक शाळा नडगीवे नं. १ येथे आंतरराष्ट्रीय योग दिन मोठ्या उत्साहात आणि प्रेरणादायी वातावरणात साजरा करण्यात आला. या कार्यक्रमात इयत्ता पहिली ते सातवीतील विद्यार्थी, शिक्षक, शिक्षकेतर कर्मचारी तसेच कृषी महाविद्यालय सांगुळवाडीचे कृषीदूत उत्स्फूर्तपणे सहभागी झाले.कार्यक्रमाची सुरुवात मुख्याध्यापिका अनिता नरेंद्र पाटकर यांच्या हस्ते दीपप्रज्वलनाने झाली. त्यानंतर विद्यार्थ्यांनी सादर केलेल्या योगगीतेने संपूर्ण वातावरण योगमय झाले. मार्गदर्शन करताना मुख्याध्यापिका पाटकर यांनी आजच्या धकाधकीच्या आणि तंत्रज्ञानप्रधान जीवनशैलीमुळे विद्यार्थ्यांमध्ये वाढणारा मानसिक ताण लक्षात घेता योगाचे महत्त्व अधोरेखित केले. योग ही केवळ व्यायामाची पद्धत नसून निरोगी जीवनाची गुरुकिल्ली असल्याचे त्यांनी सांगितले.
मुख्य योग सत्राचे संचालन शिक्षक संदीप कदम तसेच कृषीदूत प्रतीक रेगे, अजय सूर्यवंशी, शिवप्रताप देसाई, विघ्नेश सुर्वे, रितेश शिंदे, श्रीदत्त कदम, किशोर पाटील आणि अक्षय शिंदे यांनी केले. आयुष मंत्रालयाने निर्धारित केलेल्या ‘कॉमन योग प्रोटोकॉल’ नुसार ताडासन, वृक्षासन, पादहस्तासन, त्रिकोणासन, भद्रासन, वज्रासन आणि भुजंगासन यांची प्रात्यक्षिके विद्यार्थ्यांना करून दाखविण्यात आली. प्रत्येक आसनाचे आरोग्यदायी फायदे आणि घ्यावयाची काळजी याविषयी सविस्तर माहिती देण्यात आली.
यानंतर अनुलोम-विलोम, कपालभाती आणि भ्रामरी या प्राणायामांचा सराव करण्यात आला. मार्गदर्शित ध्यानाच्या माध्यमातून विद्यार्थ्यांनी मानसिक शांतता आणि एकाग्रतेचा अनुभव घेतला. कार्यक्रमाच्या शेवटी सर्व विद्यार्थी, शिक्षक आणि उपस्थितांनी दररोज किमान २० मिनिटे योगाभ्यास करण्याची सामूहिक शपथ घेतली.
राष्ट्रगीताने कार्यक्रमाची सांगता झाली. या यशस्वी उपक्रमासाठी मुख्याध्यापिका अनिता पाटकर, प्रभा अकिवाटे, संदीप कदम, जान्हवी परब तसेच कृषी महाविद्यालय सांगुळवाडीच्या कृषीदूतांनी विशेष परिश्रम घेतले.
"योगातून निरोगी शरीर, शांत मन आणि सुदृढ समाज घडविण्याचा संदेश" या उपक्रमातून विद्यार्थ्यांपर्यंत प्रभावीपणे पोहोचला.