‘माझी लाडकी बहीण’ योजनेबाबत व्हायरल बातमी खोटी; प्रशासनाचा खुलासा

सोलापूर : ‘मुख्यमंत्री माझी लाडकी बहीण’ योजनेच्या ई-केवायसी प्रक्रियेबाबत सोशल मीडियावर आणि काही प्रसारमाध्यमांच्या नावाने फिरत असलेली बातमी पूर्णपणे खोटी असल्याचा खुलासा सोलापूर जिल्हा प्रशासनाने केला आहे. शासनाकडून अशाप्रकारचे कोणतेही आदेश देण्यात आलेले नसल्याचे प्रशासनाने स्पष्ट केले आहे.
गेल्या काही तासांपासून “ई-केवायसी न केलेल्या महिलांनी तातडीने महिला व बाल विकास विभागात कागदपत्रे सादर करावीत, ही शेवटची संधी आहे,” असा दावा करणारी बातमी मोठ्या प्रमाणावर व्हायरल झाली होती. ‘झी २४ तास’ आणि ‘लोकसत्ता’ यांच्या नावाने ही माहिती प्रसारित करण्यात आल्याने अनेक लाभार्थी महिलांमध्ये संभ्रम निर्माण झाला.
या अफवेचा परिणाम म्हणून सोलापूर शहरासह तालुकास्तरावरील महिला व बाल विकास अधिकारी कार्यालयांबाहेर महिलांची मोठी गर्दी झाली. अनेक महिला आवश्यक कागदपत्रांसह कार्यालयात दाखल झाल्याने प्रशासनाची धावपळ उडाली.
दरम्यान, या प्रकरणाची गंभीर दखल घेत जिल्हा महिला व बाल विकास अधिकारी अविनाश मगर यांनी अधिकृत प्रसिद्धीपत्रक जारी करत वस्तुस्थिती स्पष्ट केली.
त्यांनी सांगितले की, “ई-केवायसी न केलेल्या महिलांनी जिल्हा महिला व बाल विकास विभागात कागदपत्रे जमा करावीत, असे कोणतेही निर्देश शासन स्तरावरून देण्यात आलेले नाहीत. सोशल मीडियावर फिरणारी बातमी चुकीची असून नागरिकांनी त्यावर विश्वास ठेवू नये.”
जिल्हा प्रशासनाने नागरिकांना अफवांपासून सावध राहण्याचे आवाहन केले आहे. कोणतीही अधिकृत माहिती संबंधित शासकीय कार्यालय किंवा अधिकृत माध्यमांतूनच तपासून घ्यावी, तसेच चुकीच्या बातम्यांमुळे कार्यालयांमध्ये अनावश्यक गर्दी करू नये, असे प्रशासनाने म्हटले आहे.